कोहलीले भारतका लागि गरेको योगदान नर्बिसौँ: प्रशिक्षक अरुण

काठमाडौँ : हालै अस्ट्रेलियालाई उसकै मैदानमा सम्पन्‍न टेस्ट श्रृङ्खलामा पराजित गरेको भारतीय क्रिकेट टिमको चौतर्फी प्रशंसा भइरहेको छ । कप्तान विराट कोहली बीचमै भारत फर्केपछि कार्यवहाक कप्तान बनेका अजिन्क्या रहानेले भारतलाई बलियो नेतृत्व प्रदान गरे । जसका कारण रहानेलाई नै भारतीय टेस्ट टिमको कप्तान बनाउनु पर्ने धारणा ब्यक्त भइरहेको छ । 

यसै सन्दर्भमा भारतीय टिमका बलिङ प्रशिक्षक भरत अरुणको भनाइ सार्वजनिक भएको छ । अरुणले रहानेले अस्ट्रेलियामा परिपक्वता देखाएको खुसी ब्यक्त गर्दै कोहलीले भारतीय टिमका लागि गरेको योगदान बिर्सन आग्रह गरेका छन् । ‘रहानेलाई बधाई दिन चाहान्छु । उनले अस्ट्रेलियामा भारतीय टिमको नेतृत्व सही ढङ्गले गरे । तर रहानेले राम्रो गरे भन्दैमा कोहलीको योगदान बिर्सन मिल्दैन । कोहलीले भारतलाई २० श्रृङ्खला मध्ये १४ मा जित दिलाएका छन्’ अरुणले भने । 

---

क्रिकेटको मात्रै होइन, अन्य खेलको कप्तानहरुको जित प्रतिशत हेर्ने हो भने कोहली उत्कृष्टमध्येका एक ठहरिने अरुणको भनाइ थियो । ‘न्यूजिल्यान्डको रग्बी टिमको जित प्रतिशत ८० प्रतिशत छ । त्यसपछि त भारतकै जित प्रतिशत धेरै छ । त्यस आधारमा कोहली विश्व खेलकुदकै उत्कृष्ट कप्तान मध्येका एक हुन् । काेहेलीले भारतीय टिममा बलियो प्रभाव पारेका छन् । मैदान भित्र उनी शसक्त छन्, मैदान बाहिर पनि उनको प्रभाव कम छैन’ अरुणले भने । 

कोहलीले रहानेको सुझाव सधैं सुन्ने गरेकाले ती दुई भारतीय टिमका लागि महत्वपूर्ण जोडी रहेको पनि अरणको भनाइ थियो । ‘रहाने प्रभावशाली खेलाडी रहेकोमा शंका छैन । उनलाई कोहलीले सम्मान गर्छन् । उनको सल्लाह मान्छन् । दुई खेलाडीबीच राम्रो साझेदारी छ । त्यसकारण रहाने कप्तान भइरहनु पर्दैन, उनी कोहलीका सहायकका रुपमा पनि उत्तिकै शसत्त रहन सक्छन्’ अरुणले थपे । 

भारतले अस्ट्रेलियालाई ब्रिसबेनमा सम्पन्न अन्तिम टेस्टमा हराउँदै बोर्डर–गावस्कर ट्रफीको रक्षा गरेको थियो । जुन अस्ट्रेलियाका लागि गाब्बामा ३२ वर्ष यता ब्यहोरेको पहिलो हार थियो ।