इन्टरले एसी मिलानलाई हरायो, इब्राहिमोभिकलाई रेर्ड कार्ड !

काठमाडौँ : कोपा इटाली फुटबलमा इन्टर मिलानले एसी मिलानलाई हराएको छ । मंगलबार राती भएको खेलमा इन्टरले एसी मिलानलाई २-१ गोल अन्तरले पराजित गरेको हो । इन्टर मिलानलाई जिताउन रोमेलु लुकाकु र क्रिष्टियन इरिक्सनले गोल गरे ।

खेलमा अग्रता भने एसी मिलानले लिएको थियो । उसका लागि स्टार स्ट्राइकर जाल्टान इब्राहिमोभिकले ३१ औँ मिनेटमा गोल गरे । पहिलो हाफमा अग्रता लिएको एसी मिलान खेल जित्नेमा ढुक्क थियो ।

---

तर दोस्रो हाफको ७१ औँ मिनेटमा इन्टर मिलानले पेनाल्टी पायो । रोमेलु लुकाकुले पेनाल्टीलाई गोलमा परिणत गरे । पेनाल्टीअघि लुकाकु र इब्राहिमोभिकबीच विवाद भएको थियो । ५८ औँ मिनेटमा रेफ्रीले रेर्ड कार्ड देखाएपछि इब्राहिमोभिकले मैदान छाडेका थिए ।

दश खेलाडीमा सिमित भएको एसी मिलानलाई हराउन थपिएको अतिरिक्त समयको ९७ औँ मिनेटमा इरिक्सनले निर्णायक गोल गरे । जितसँगै इन्टर मिलान सेमीफाइनल प्रवेश गरेको छ ।