ब्राजिलियन मिडफिल्डर ओस्कारले दिए ब्रुएना र सलाहले चेल्सीमा मौका नपाउनुको कारण

काठमाडौँ : हाल चिनियाँ सुपर लिग (सीएसएल) खेलिरहेका ब्राजिलियन मिडफिल्डर ओस्कारले चेल्सीमा केभिन डे ब्रुएना र मोहम्मद सलाहले मौका नपाएको बारे आफ्नो धारण राखेका छन् । सन् २०१२ देखि २०१७ सम्म चेल्सीमा रहेका ओस्कारले ब्रुएना र सलाहसँग लन्डन क्लबमा खेलेका थिए । 

चेल्सीमा पर्याप्त मौका नपाएका ब्रुएना र सलाह हाल म्यानेचस्टर सिटी र लिभरपुलका महत्वपूर्ण खेलाडी रहेका छन् । चेल्सीले उनीहरुमाथि धैर्यता नराखेको बारेमा पटक पटक बहस हुँदै आएको छ । ओस्कारका अनुसार ब्रुएनाले स्थिर प्रदर्शन गर्न नसकेको र सलाहसँग आत्मविश्‍वास नभएकाले उनीहरूले चेल्सीमा अपेक्षाकृत मौका नपाएको बताए । उल्फसबर्ग हुँदै सिटी पुगेका बुएनाले पूर्वी म्यानचेस्टर क्लबलाई दुई लिग उपाधि जित्‍न सहयोग गरेका छन् । उता सलाहले लिभरपुलका लागि एक सय ८० खेलमा एक सय १३ गोल गरिसकेका छन् । 

---

‘चेल्सीमा ब्रुएना र हाजार्ड सम्मिलत मिडफिल्ड प्रयोग गर्ने योजना थियो । कतिपय खेलमा प्रयोग गरियो र सफल पनि भयो । पछि उनी घाइते भए जसले गर्दा उनको स्थान सुरक्षित भएन । चेल्सीमा त्यसबखत धेरै मिडफिल्डर थिए । त्यसैले पनि उनले पाउने मौका सिमित भयो । फेरी उनको लय पनि अस्थिर थियो ।’ सांघाईका लागि दुई सय तीन खेल खेलिसकेका ओस्कारले भने । 

ओस्कारले सलाह अभ्यासमा उत्कृष्ट रहने गरे पनि खेल दौरान भने प्रभावकारी नभएको धारणा ब्यक्त गरे । ‘सायद उनीसँग आत्मविशवास थिएन । उनी मैदानमा लजालु देखिन्थे । तर लिभरपुलमा उनी फरक छन् । आत्मविश्‍वाससाथ खेलिरहेका छन् । खेलाडीहरूले कतिपय अवस्थामा दबाब थेग्‍न सक्दैनन् । हुनसक्छ चेल्सीमा सलाहले दबाब थेग्‍न सकेनन्,’ सलाहका बारेमा ओस्कारको धारणा थियो । 

ओस्कारले चेल्सीका पूर्व प्रशिक्षक जोसे मौउरिन्होले आफुलाई स्टामफोर्ड ब्रिजमा राम्रो खेल्न सधैं प्रेरित गरेको पनि बताए । ‘मौउरिन्हो विश्‍वकै उत्कृष्ट प्रशिक्षकमध्येका एक हुन् । उनले मलाई चेल्सीमा धेरै सहयोग गरेका हुन् । उनी आफ्ना खेलाडीहरुलाई आत्मविश्‍वास दिइरहेका हुन्छन् ।’