चार मिनेटमा दुई गोल गरेर बर्नलीले भिल्लालाई हरायो

काठमाडौँ : चार मिनेटमा दुई गोल गरेपछि इंग्लिस प्रिमियर लिग फुटबलमा बर्नलीले एस्टन भिल्लालाई हराएको छ । बुधबार राती भएको खेलमा बर्नलीले भिल्लालाई ३-२ गोल अन्तरले हराएको हो ।

खेलमा अग्रता भने भिल्लाले लिएको थियो । १४ औँ मिनेटमा ओलिए वाटकिन्सले गोल गरेर टिमलाई पहिलो हाफमा १-० को अग्रता दिलाएका थिए । दोस्रो हाफको ५२ औँ मिनेटमा बर्नलीका बेन्मीले गोल गर्दै खेल बराबरीमा ल्याए ।

---

६८ औँ मिनेटमा ज्याक ग्रस्लीले गोल गर्दै भिल्लालाई २-१ को अग्रता दिलाए । खेल जित्ने अवस्थामा पुगेको भिल्लाको खुशी धेरैबेर टिक्न सकेन । बर्नलीका लागि ड्वीट म्याक्निलले ७६ औँ मिनेटमा गोल गरेर खेल बराबरीमा ल्याए ।

त्यसको चार मिनेटपछि क्रिस वुडले बर्नलीका लागि विजयी गोल गरे । जितसँगै बर्नली २२ अंकसहित १५ औँ स्थानमा छ । हार व्यहोरेको भिल्ला २९ अंकसहित १० औँ स्थानमा छ ।