रोनाल्डोलाई इटालियन प्रहरीको केरकार

काठमाडौँ : युभेन्टसका फरवार्ड क्रिस्टियानो रोनाल्डो इटालियन प्रहरीको अनुसन्धानको घेरामा परेका छन् । कोभिड–१९ सम्बन्धि नियम उल्लघंन गरी प्रेमिकाको जन्मदिन मनाउन भन्दै लामो यात्रामा निस्केपछि रोनाल्डो स्थानिय प्रहरीको अनुसन्धानमा परेका हुन् । 

प्रेमिका जोरजिना रोद्रिगेजको जन्मदिन मनाउन रोनाल्डो पाइडमोन्ट र भाल्ले डा ओस्टा क्षेत्रबीचको क्षेत्रमा पुग्दा कोभिड सम्बन्धि नियम उल्लघंन भएको इटालियन प्रहरीको आरोप छ । सामाजिक सञ्जालमा रोनोल्डोले यात्राकाे भिडियो पोस्ट गरे पनि पछि मेटेको बताइएको छ । 

---

इटालीमा प्रत्येक दिन सयौँ कोभिड–१९ संक्रमितको मृत्य भइरहेको छ । गत वर्ष सुरु भएको यस महामारीका कारण इटालीयन राजनीति समेत संकटबाट गुज्रिरहेको छ । त्ययसकारण पनि इटालीमा कोभिड–१९ सम्बन्धि नियम कडा बनाइएको छ ।

भाल्ले डा ओस्टा प्रहरीले रोनाल्डो र उनकी प्रेमिका स्थानिय स्की रिसोर्टमा आएको प्रमाण भएकाले त्यसमा टेकेर अनुसन्धान भइरहेको बताएको छ । सो क्षेत्रमा अत्यन्त जरुरी काम नभई यात्रा गर्न वर्जित गरिएको छ । इटालियन सञ्चार माध्यमका अनुसार रोनोल्डो र उनकी प्रेमिका मगंलबार उक्त रिसोर्टमा पुगेको र बुधबार टुरिन फर्केको थिए ।