एनफिल्डमा सिटी र लिभरपुलको कीर्तिमान

काठमाडौँ : प्रिमियर लिगमा आइतबार च्याम्पियन लिभरपुललाई हराएसँगै म्यानचेस्टर सिटीले नयाँ कीर्तिमान राखेको छ । सिटीले इंगल्यान्डको शीर्ष श्रेणीका क्लबमध्ये लामो समयसम्म अपराजित रहने कीर्तिमान राखेको हो । एनफिल्डमा सन् २००३ यताको पहिलो जित दर्ता गर्नेक्रममा एल्काई गुन्डोगनले दुई गोल गरे । एनफिल्डमा घरेलु टिमलाई ४-१ ले हराउन गुन्डोगन बाहेक रहिम स्टर्लिङ र फिल फोडेनले एक-एक गोल गरे । 

जारी सिजनमा सबै खाले प्रतियोगितामा गरी सिटी १४ खेलमा अपराजित छ । जुन इंग्लिस फुटबलमा प्रेस्टन र आर्सनलले राखेको कीर्तिमानको बराबरी हो । हाल इंगल्यान्डको दोस्रो श्रेणीमा रहेको प्रेस्टनले सन् १९८२ र आर्सनलले सन् १९८७ मा १४ खेलमा लगातार जित हासिल गरेका थिए । पेप ग्वार्डिओलाको नेतृत्वमा रहेको सिटी गत डिसेम्बर १५ यता अपराजित छ । 

---

उता पराजित लिभरपुल भने यस सिजन लगातार खराब लयबाट गुज्रिरहेको छ । यार्गेन क्लपको टोलीले आइतबार घरेलु मैदानमा लगातार तेस्रो हार व्यहाेर्‍याे । लिभरपुल पछिल्ला खेलहरुमा बर्नली र ब्राइटनसँग पराजित भएको थियो । लिभरपुलले यसअघि सन् १९६३ मा मात्रै एनफिल्डमा लगातार तीन खेलमा पराजय भोगेको थियो । 

सिटीसँग हारेसँगै लिभरपुलले अर्को पनि कीर्तिमान राख्यो । घरेलु मैदानमा लगातार तीन खेलमा पराजित हुने ६५ वर्ष यताकै पहिलो लिग विजेता बनेर । यो कीर्तिमान चेल्सीको नाममा थियो । सन् १९५६ को त्यस लिगमा चेल्सी १६ औँ भएको थियो ।