सातदाबाटो युथ ए डिभिजनमा उक्लियो

काठमाडौँ : सातदोबाटो युथ क्लब नेपाली फुटबलको शीर्ष श्रेणी ए डिभिजनमा बढुवा भएको छ । बी डिभिजनमा शनिबार भएको खेलमा दोस्रो स्थानको खुमलटार युथ क्लबले श्रीभगवती क्लबसँग हार ब्यहोरेपछि सातदोबाटो ए डिभिजनमा उक्लेको हो । 

लिगमा सातदोबाटोले नौ खेलबाट २५ अंक बनाएको छ । दोस्रो स्थानको खुमलटारले भने एक खेल बढी खेल्दै २२ अंक बटुलेको छ । लिगमा सातदोबाटोले दुई खेल खेल्न बाँकी छ भने खुमलटारको एक खेल बाँकी रहेको छ । हेड टु हेडमा समेत खुमलटार पछाडि रहेकाले सातदोबाटाको बढुवा पक्का भएको हो । 

---

सातदोबाटोस्थित एन्फा कम्लेक्सको मैदानमा भएको खेलमा खुमलटारले सुरुवाती अग्रता लिएको थियो । सबिन केसीले २६ औँ मिनेटमा गाल गरेपछि खुमलटारले खेलमा अघि बढ्यो । तर डोना थापा र आशिष श्रेष्ठले एक-एक गोल गरेपछि श्रीभगवतीले महत्वपूर्ण तीन अंक प्राप्त गर्‍यो । 

शनिबारै भएको खेलमा ब्वाइज युनियनले टुसाल युथ क्लबलाई १-० ले पराजित गर्‍यो । खेलको एक मात्र गोल मिलन लिम्बुले गरे । जितसँगै चौँथौँ स्थानको ब्वाइज युनियनको १० खेलबाट १७ अंक भएको छ । पराजित टुसाल भने नौ अंकका साथ नऔँ स्थानमा छ ।