नेपाल-पाकिस्तान फ्रेन्डसिप क्रिकेट: बलपार्क र बासुलिङको जित

काठमाडौं: नेपाल-पाकिस्तान फ्रेन्डसिप टी-ट्वान्टी क्रिकेट प्रतियोगितामा सोमबार बल पार्क क्रिकेट एकेडेमी र बासुलिङ क्रिकेट एकेडेमीले जित दर्ता गरेका छन् । धुम्बाराहीस्थित पाकिस्तान दूतावासको मैदानमा भएको खेलमा बल पार्कले काठमाडौं क्रिकेट ट्रेनिङ सेन्टरलाई ४ विकेटले पराजित गर्‍यो । टस जितेर ब्याटिङ रोजेको काठमाडौंले निर्धारित २० ओभरमा ७ विकेट गुमाउदै १ सय ५६ रन बनायो । काठमाडौंको लागि सचिन लेखकले अविजित रहदै अर्धशतकीय पाली खेले । उनले सर्वाधिक ८१ रन जोडे भने विशाल श्रेष्ठले २७ रन जोडे । बल पार्कका विशाल मण्डल र शशांक अग्रवालले समान २-२ विकेट लिए । 

काठमाडौं क्रिकेटले दिएको १ सय ५७ रनको लक्ष्य बल पार्कले १५ ओभरमा ६ विकेट गुमाउदै प्रतियोगितामा पहिलो जित दर्ता गरायो । बल पार्कको जितमा कप्तान तथा म्यान अफ दि म्याच प्रशन्‍न शाक्यले अर्धशतकसहित ८५ रन जोडे । यस्तै निर्भिक पाठक र मेहूल श्रेष्ठले समान १७ रन जोडे । काठमाडौंको लागि निराजन पुम्रेले ३ विकेट लिए । 

---

प्रतियोगितामा बल पार्कको यो पहिलो जित हो । यस अघि बल पार्क बालुवाटार क्रिकेट क्लबसँग पराजित भएको थियो । सोमबारै भएको आर्के खेलमा बासुलिङले स्कुल अफ क्रिकेटलाई ५ विकेटले हरायो । टस जितेर ब्याटिङ रोजेको स्कुल अफ क्रिकेटले ८ विकेट गुमाउदै १ सय ६४ रन बनायो । उसको लागि सर्बोच्च बस्नेतले ३२ र रोशन पलामीले २४ रन बनाए । 

बासुलिङका लागि राजेश यादब, डब्लु मालिक र प्रकाश शाहिले समान २-२ विकेट लिए । स्कुल अफ क्रिकेटले दिएको १ सय ६७ रनको लक्ष्य एक बल बाँकी रहदा पुरा गर्‍यो । बासुलिङलाई जित दिलाउन डब्लु मलिकले अविजित रहदै ३२ बलमा ५९ रन बनाए । उनी म्यान अफ दि म्याच समेत चुनिए । यस्तै सहिल पटेलले ३० रन बनाए । बासुलिङको लागि जनक हुमागाईले दुई विकेट लिए । पाकिस्तान दूतावासले आयोजना गरेको छैटौं संस्करणको यस प्रतियोगितामा १२ टोलीको सहभागिता रहेको छ ।