इन्टर मिलानलाई 'पोर्न साइट'को प्रायोजन प्रस्ताव

काठमाडौँ: इटालियन क्लब इन्टर मिलानलाई पोर्न साइट स्ट्रिपच्याटले प्रायोजन गर्ने प्रस्ताव गरेको छ । युरोपेली सञ्चार माध्यमहरुका अनुसार स्ट्रिपच्याटले इन्टरको मुख्य प्रायोजक हुन वार्षिक दुई करोड ३० लाखको सम्झौता प्रस्ताव राखेकाे हाे । 

इन्टरलाई पछिल्लो २७ वर्षदेखि टायर उत्पादक पिरेल्लीले प्रायोजन गर्दै आएको छ । तर इन्टर र पिरेल्लीबीचको सम्झौता यसै सिजनको अन्त्यमा सकिँदैछ । त्यसकारण इन्टर नयाँ प्रायोजकको खोजीमा रहेको छ । 

---

इटालियन लिग सिरी ए को शीर्षस्थानमा रहेको इन्टर आर्थिक समस्याको सामना गरिरहेको छ । त्यसैले पनि इन्टरलाई आर्थिक सहयोग गर्ने खाल्को प्रायोजकको आवश्यकता परिरहेको अवस्था छ । यसै सेरोफेरोमा इन्टरले स्ट्रिपच्याटको प्रस्ताव पाएको हो । 

इन्टरको मालिक रहेको चिनियाँ कम्पनी सुनिङले क्लबका लागि आर्थिक साझेदार पनि खोजीरहेको छ । इटालियन सञ्चार माध्यमले सुनिङले बीस करोड बराबरको सेयर बेच्न चाहिरहेको खबर प्रकाशित गरेका छन् ।