मेयर कपको फाइनलमा पुलिस र एपीएफ भिड्ने

काठमाडौँ: शसस्‍त्र प्रहरीको एपीएफ क्लब काठमाडौँ मेयर कपको फाइनल प्रवेश गरेको छ । काठमाडौँ मेयर-११ लाई सात विकेटले पराजित गर्दै एपीएफले विभागिय प्रतिद्वन्द्वी नेपाल पुलिस क्लबसँगको उपाधि भिडन्त पक्का गरेको हो । दुबै टिमले चार खेलबाट समान छ अंक बटुले । फाइनल खेल शनिबार हुनेछ । 

कीर्तिपुरस्थित त्रिभुवन विश्‍वविद्यालयको क्रिकेट मैदानमा भएको खेलमा मेयर-११ ले पहिले ब्याटिङ गर्दै ४८.५ ओभरमा एक सय ७७ रन बनायो । उता एपीएफले ४४.१ ओभरमा तीन विकेटको क्षतीमा लक्ष्य पुरा गर्‍यो । 

---

टस हारेर ब्याटिङ गरेको मेयर-११ का लागि सन्दिप रजालीले सर्वाधिक ४८ रन बनाए । सन्दिपले ८३ बलको सामना गर्दा पाँच चौका प्रहार गरे । मेयर-११ का लागि हरी शंकर साहले ३६ रनको योगदान गरे भने विक्रम भुषालले २० रन बनाए । बाँकी ब्याट्सम्यानले भने उल्लेख्य रन जोड्न सकेनन् । 

बलिङतर्फ अविनाश बोहारो र कमल ऐरीले समान तीन-तीन विकेट लिए । त्यस्तै, बसन्त रेग्मी, कप्तान शरद भेष्वाकर र भुवन कार्कीले एक-एक विकेट हात पारे । 
विजयी एपीएफका लागि दुई खेलाडीले अर्धशतक बनाए । शरद र सन्दिप जोराले अविजित रहँदै क्रमशः ६१ र ६२ रन जोडे । त्यसअघि ओपनर शंकर रानाले ३१ रन बनाएका थिए । मेयर–११ का लागि अनुज चुनारा, अनिल खरेल र सन्दिप लामिछानेले एक-एक विकेट लिए ।