के अग्वेरो बार्सिलोना जाँदैछन् ?

काठमाडौँ : म्यानचेस्टर सिटीलाई प्रिमियर लिगको ‘पावर हाउस’ बन्‍न मद्दत गरेका सर्जियो अग्वेरो यस सिजन पेप ग्वार्डिओलाका लागि मुख्य स्ट्राइकर बन्‍न सकेका छैनन् । कोभिड-१९ को संक्रमण अनि चोटका कारण अग्वेरोले लिगमा १४ खेल गुमाएका छन् । पछिल्ला साताहरुमा उनी खेल्नका लागि तयार भए पनि ग्वार्डिओलाको नजरमा पर्न सकेका छैनन् । 

जारी सिजनको अन्त्यमा फ्रि-एजेन्ट बन्‍ने अग्वेरोले सिटीसँग नयाँ सम्झौता गर्ने सम्भावना न्यून हुँदै गएको छ । त्यसकारण उनी बार्सिलोनातर्फ लाग्ने खबर आइरहेका छन् । अग्वेरोले बार्सिलोनाका कप्तान लियोनल मेस्सी र अध्यक्ष जोआन लार्पोटालाई अर्को सिजन स्पेनी क्लबको जर्सी लगाउने बचन पनि दिइसकेको मार्का लगायतका अखबारहररूको दाबी छ । 

---

यसै सन्दर्भमा अग्वेरोलाई शुक्रबार प्रश्न पनि गरियो । ‘सञ्‍चार माध्यमले अग्वेरो बार्सिलोना जादैछ भनेर लेखिरहेका छन् । तर मेरो आग्रह छ अहिले नै यस किसिमको समाचार नलेखौँ । म अहिले सिटीसँगै छु । भविष्यमा के हुन्छ थाहा छैन,’ अग्वेरोले अमेरिकी ‘लाइभ स्ट्रिमिङ एप्पिलेकेसन’ ट्विचमार्फत भने ।