त्रिकोणात्मक सिरिजमा नेपालको विजयी सुरुवात

काठमाडौं । टि–ट्वेन्टी अन्तर्राष्ट्रिय त्रिकोणात्मक सिरिजमा नेपालले विजयी सुरुवात गरेको छ । आज भएको पपुवा न्यू गिनी (पीएनजी)सँगको खेलमा नेपाल १६ रनले विजयी भएको हो ।

नेपालले दिएको १८४ रनको लक्ष्य पछ्याएको पीएनजी १६८ रनमै समेटियो । नेपालका लागि सन्दिप लामिछाने र करन केसीले समान ३-३ विकेट लिए । यसअघि नेपालले पीएनजीलाई १८४ रनको विशाल लक्ष्य दिएको थियो । टस हारेर ब्याटिङको निम्तो पाएको नेपालले निर्धारित २० ओभरमा ९ विकेट गुमाएर १८३ रन बनाएको हो ।

---

नेपालका लागि आसिफ शेखले सर्वाधिक ४३ रन बनाए । ३५ बल खेलेका उनले पाँच चौका र एक छक्काको मद्दतले ४३ रन बनाएर आउट भए । त्यस्तै रोहित पौडेलले ३४ रन बनाउँदा कुशल भुर्तेलले २० रन बनाएर आउट भए ।

करण केसी १४ रन बनाएर आउट भए । आरिफ शेखले ३४ रन बनाए । यसअघि भएको एक दिवशीय सिरिज पीएनजीले क्लिन स्विप गरेको थियो ।