बंगलादेशविरुद्ध न्युजिल्याण्डको अग्रता

काठमाडौँ : बंगलादेशसँगको पहिलो एकदिवसीय क्रिकेटमा न्युजिल्याण्ड विजयी भएको छ । डुनीडिनमा घरेलु टोली न्युजिल्याण्डले बंगलादेशलाई ८ विकेटको फराकिलो अन्तरले पराजित गरेको हो ।

---

टस हारेर पहिले ब्याटिङ गरेको बंगलादेशले ४१ ओभर ५ बलमा अलआउट हुँदै १३१ रन मात्रै बनाउन सक्यो । उसका लागि महमुदुल्लाहले २७ र लिटन दासले २३ रन बनाए । न्युजिल्याण्डका ट्रेन्ट बोल्टले ४ विकेट लिए ।

बंगलादेशले दिएको १३२ रनको लक्ष्य न्युजिल्याण्डले २१ ओभर २ बलमा २ विकेट गुमाएर भेट्टायो । उसका लागि हेनरी निकोल्सले नटआउट ४९ रनको योगदान दिए । यस्तै मार्टिन गुप्टिलले ३८ रन बनाए । 

बंगलादेशका तस्किन अहमद र हसन महमुदले एक-एक विकेट लिए । जितसँगै न्युजिल्याण्डले तीन खेलको एकदिवसीय सिरिजमा १-० को अग्रता लिएको छ ।