फाइनलमा कमलको अभाव महसुस हुनेछः कप्तान लामिछाने

काठमाडौँ – नेपाली राष्ट्रिय क्रिकेट टिमका कप्तान सन्दीप लामिछानेले त्रिकोणात्मक टी–ट्वान्टी सिरिज अन्तर्गत पपुवा न्यूगिनी (पीएनजी) विरुद्धको फाइनल खेलमा कमल सिंह ऐरीको अभाव महसुस हुने बताएका छन् । नेपाल र पीएनजीबीचको खेल त्रिवी क्रिकेट मैदानमा सोमबार १२ः३० बजेबाट हुनेछ । 

फाइनल अघि सिरिजको ट्रफी सार्वजनिक गर्ने कार्यक्रममा लामिछानेले पीएनजीविरुद्ध कमलको अभाव खड्किने बताए । मलेसियाविरुद्धको खेलका क्रममा कमल घाइते भएका थिए र उनको आईतबार शल्यक्रिया गरिएको थियो । 

---

‘कमल पछिल्लो समयमा टिमको एक उत्कृष्ट बलर हुन् । टिममा उनको अभाव महसुस हुनेछ । कमलको विकल्प खोज्नुपर्नेछ,’ लामिछानेले भने । लामिछानेले सोमपाल कामीलाई मलेसियाविरुद्धको खेलमा आराम दिइएको तथा उनी फाइनलका लागि उपलब्ध हुने समेत बताए । 

कप्तान लामिछानेले नेपालले सिरिज अन्तर्गतको सुरुवातका खेलमा खेलाडीलाई परिक्षण गरिएको समेत उल्लेख गरे । उनले टिममा आएका युवा खेलाडीहरुले राम्रो प्रदर्शन गरिरहेको बताए । 

यता नेपाली टिमका प्रशिक्षक पुवुदु दासानायकेले पनि नेपाली टिममा रहेका युवा खेलाडी प्रतिभावान रहेको तथा उनीहरुले उत्कृष्ट प्रदर्शन गरिरहेको बताए । 

‘उनीहरुले आफ्नो स्थान सुरक्षित गरिरहेका छन्,’ दासानायकेले थपे । प्रशिक्षक दासानायकेले नेपाल क्रिकेट संघ (क्यान) ले यस्ता प्रतियोगिताहरु आयोजना गरिरहनुपर्ने समेत बताए ।