समूह चरणमा पुग्ने मछिन्द्रको लक्ष्य

काठमाडौँ – मछिन्द्र क्लबका मुख्य प्रशिक्षक प्रवेश कुटवालले एएफसी कप छनोटको समूह चरण पुग्ने लक्ष्य रहेको बताएका छन् । श्रीलंकाको ब्लु स्टार स्पोर्टस क्लबविरुद्धको प्रारम्भिक छनोट अघि आयोजित पत्रकार सम्मेलनमा मछिन्द्रका प्रशिक्षक कटुवालले समूह चरणको यात्रा तय गर्ने लक्ष्य रहेको बताए । 

मछिन्द्र र ब्लु स्टारबीचको खेल त्रिपुरेश्वरस्थित दशरथ रंगशालामा मंगलबार साँझ ५ बजे सुरु हुनेछ । 

---

प्रशिक्षक कटुवालले टिमको तयारी राम्रो रहेको तथा समूह चरणमा पुग्न मछिन्द्र सक्षम रहेको उल्लेख गरे । उनले ए डिभिजन लिग खेलेका खेलाडीहरु नै टिममा रहेको बताए । 

यता मछिन्द्रका कप्तान सुजल श्रेष्ठले पनि समूह चरणसम्मको यात्रा तय गर्ने लक्ष्य रहेको बताए । उनले टिमको तयारी राम्रो भएको जनाए । 

ब्लु स्टार र मछिन्द्रबीच हुने खेलको विजेताले दोस्रो चरणमा भारतको मोहन बगानविरुद्ध खेल्नेछ । उक्त खेल अप्रिल १२ मा हुनेछ ।

मछिन्द्रले पहिलो पटक एएफसी कप छनोट खेल्न लागेको हो । यस अघि मछिन्द्रसँग क्लब लाइसेन्स नभएका कारण लिग जितेपनि उक्त मौका गुमाउन पुगेको थियो ।