'आईसीसी प्लेयर अफ द मन्थ'को मनोनयन सार्वजनिक

काठमाडौँ – मार्च महिनाका लागि आईसीसी प्लेयर अफ द मन्थको मनोनयनमा पर्ने खेलाडीको नाम सार्वजनिक गरिएको छ । आईसीसीले बुधबार मनोनयनमा पर्ने खेलाडीहरुको नाम सार्वजनिक गरेको हो ।  

आईसीसीका अनुसार पुरुषतर्फ प्लेयर अफ द मन्थको मनोनयनमा पाकिस्तानका कप्तान बाबर अजाम, वेस्ट इन्डिजका क्रेग ब्रेथवेट र अष्ट्रेलियाका टेष्ट कप्तान प्याट कमिङ्स रहेका छन् ।

---

बाबरले अष्ट्रेलियाविरुद्धको सिरिजमा उत्कृष्ट प्रदर्शन गरेका थिए । उनले अष्ट्रेलियाविरुद्धको टेष्ट सिरिजमा ३ सय ९० रन बनाएका थिए । यता वेस्ट इन्डिजले इंग्ल्यान्डविरुद्धको ऐतिहासिक टेष्ट सिरिज जित्दा ब्रेथवेटले ३ सय ४१ रन जोडे । 

अष्ट्रेलियाले पाकिस्तानविरुद्धको टेष्ट सिरिज जित्दा अष्ट्रेलियाका कप्तान कमिङ्ले उत्कृष्ट बलिङ गरे । उनले पाकिस्तानविरुद्धको अन्तिम टेष्टको पहिलो इनिङ्समा ५ तथा दोस्रो इनिङ्समा तीन विकेट लिएका थिए । 

महिलातर्फको मनोनयनमा भने इंग्ल्यान्डकी सोफी इक्लेस्टोन, अष्ट्रेलियाकी राचायल हायनेस र दक्षिण अफ्रिकाकी लाउरा उल्भाआर्ट रहेका छन् ।