रुपन्देहीले मलेसिया ११ लाई पराजित गर्यो

काठमाडौँ – प्रो क्लब च्याम्पियनशीप क्रिकेटमा रुपन्देही ११ ले विजयी सुरुवात गरेको छ । भैरहवाको सिद्धार्थ रंगशालामा शुक्रबार सुरु भएको प्रतियोगितामा रुपन्देहीले मलेसिया ११ लाई ६ विकेटले पराजित गर्दै विजयी सुरुवात गरेको हो । 

१ सय ३२ रनको लक्ष्य रुपन्देहीले १९ ओभर २ बलमा ४ विकेट गुमाएर पुरा गर्यो । रुपन्देहीलाई जित दिलाउन ओपनर प्रज्वल थापाले ३२ बलमा ५ चौका र १ छक्का प्रहार गर्दै सर्वाधिक सर्वाधिक ३८ रनको योगदान गरे । 

---

अलराउन्डर बशिर अहमदले अविजित २७ तथा  सन्दीप रजाली अविजित २४ रन जोडे । देव खनालले २२ रन, तुल बहादुर थापा ७ तथा सुशान्त थापा ६ रनमा आउट भए । मलेसियाका विरनदीप सिंहले २ तथा मोहम्मद आमिर सैद अजिजले १ विकेट लिए । 

यस अघि टस जितेर पहिले ब्याटिङ गरेको मलेसिया १९ ओभरमा ५ बलमा अलआउट हुदै १ सय ३१ रन जोड्यो । मलेसियाका ओपनर विरनदीप सिंहले सर्वाधिक ६६ रनको योगदान गरे । सैद अजिजले २५ रन जोडे ।

रुपन्देहीका कप्तान कृष्ण कार्कीले सर्वाधिक ३ विकेट हात पारे । बशिर अहमदले २ तथा अनिल खरेल, दुर्गेश गुप्ता र विक्रम भुषालले १–१ विकेट लिए ।