एपेक्स र गोल्डेन गेट विजयी

काठमाडौँ – प्याट्रियोट्स कप इन्टर कलेज टी–ट्वान्टी क्रिकेट प्रतियोगिता अन्तर्गत एपेक्स कलेज र गोल्डेन गेट कलेजले विजयी सुरुवात गरेका छन् । मुलपानी क्रिकेट मैदानमा वर्षाका कारण १५ ओभरमा सिमित भएको खेलमा एपेक्सले ब्लुबर्ड कलेजलाई ५ रनले पराजित गर्‍याे । 

जितका लागि १ सय ९ रनको लक्ष्य पछ्याएको ब्लुबर्डले निर्धारित ओभरमा ९ विकेट गुमाएर १ सय ३ रनमात्र जोड्न सक्यो । ब्लुबर्डका लागि विवेक राना मगरले सर्वाधिक ४० रन जोडे । एपेक्सका लागि शशांक अग्रवालले सर्वाधिक तीन विकेट लिए । 

---

यस अघि टस जितेर ब्याटिङ गरेको एपेक्सले ४ विकेट गुमाउदै १ सय ८ रन जोड्यो । एपेक्सका हरिस बाबुले सर्वाधिक ३५ रन जोडे । ब्लुबर्डका विवेक राना मगरले २ विकेट लिए । 

अर्को खेलमा गोल्डेन गेटले मोर्गन कलेजलाई ६ विकेटले पराजित गर्यो । गोल्डेन गेटले ९२ रनको लक्ष्य १२ ओभरमा ४ विकेट गुमाएर पुरा गर्यो । गोल्डेन गेटका लागि तृतराज दासले सर्वाधिक ३९ र रवी साहले ३० रन जोडे । मोर्गनका अफजल अलीले २ विकेट हात पारे । 

यस अघि टस जितेर पहिले ब्याटिङ गरेको मोर्गनले निर्धारित २० ओभरमा अलआउट हुदै ९१ रन जोड्यो । मोर्गनका लागि दिपेन्द्र कुमार पण्डितले सर्वाधिक २२ रनको योगदान गरे । गोल्डेन गेटका रिजन ढकाल र सचिन शर्माले समान तीन–तीन विकेट लिए ।