प्रो क्लब क्रिकेटः उत्तर प्रदेश र आर्मी सेमिफाइनलमा

काठमाडौँ – उत्तर प्रदेश क्लब ११ र त्रिभुवन आर्मी क्लब प्रो क्लब च्याम्पियनशीप क्रिकेटको सेमिफाइनलमा प्रवेश गरेका छन् । उत्तर प्रदेशले आफ्नो दोस्रो खेलमा नेपाल एपीएफ क्लबलाई ७ विकेटले पराजित गरेपछि उत्तर प्रदेश र आर्मी एक खेल अगावै अन्तिम चारमा प्रवेश गरे । 

भैरहवाको सिद्धार्थ रंगशालामा एपीएफले दिएको ७७ रनको लक्ष्य उत्तर प्रदेशले १३ ओभर २ बलमा ३ विकेट गुमाएर पुरा गर्यो । उत्तर प्रदेशका लागि राज यादवले अविजित २९ रन तथा विवेक सिंहले २२ रनको योगदान गरे । एपीएफका लागि नन्दन यादव र अमर रौटेलाले एक–एक विकेट लिए । 

---

यस अघि टस जितेर पहिले ब्याटिङ गरेको एपीएफ १७ ओभर १ बलमा अलआउट हुदै ७६ रनमा सिमित भयो । एपीएफका लागि अमर रौटेलाले सर्वाधिक २५ रन जोडे । उत्तर प्रदेशका लागि प्रिन्स शाहीले सर्वाधिक ४ विकेट तथा विपिन चन्द्रले २ विकेट लिए ।

यता लगातार दुई खेलमा पराजय भोगेका एपीएफ र ट्यालेन्ट हन्ट क्रिकेट एकेडेमी प्रतियोगिताबाट बाहिरिएका छन् । समूह ‘बी’ मा रहेका उत्तर प्रदेश र आर्मीले समान चार–चार अंक जोडेका छन् ।