प्रो क्लब क्रिकेटः एपीएफको सान्त्वना जित

काठमाडौँ – प्रो क्लब च्याम्पियनशीप क्रिकेट अन्तर्गत नेपाल एपीएफ क्लबले सान्त्वना जित हात पारेको छ । प्रतियोगिताको सेमिफाइनल पुग्न नसकेको एपीएफले मंगलबार ट्यालेन्ट हन्ट क्रिकेट एकेडेमीलाई ७ विकेटले पराजित गर्यो । 

एपीएफले १ सय २६ रनको लक्ष्य १९ ओभरमा ३ विकेट गुमाएर पुरा गर्यो । एपीएफलाई जित दिलाउन कप्तान प्रदिप ऐरीले अविजित ५४ रन तथा दिपक बोहराले ४२ रनको योगदान गरे । ट्यालेन्ट हन्टका मोहमद मोसराफाले एक विकेट लिए ।

---

यस अघि टस जितेर पहिले ब्याटिङ गरेको ट्यालेन्ट हन्टले निर्धारित २० ओभरमा ८ विकेट गुमाएर १ सय २५ रन जोड्यो । उसका लागि ओपनर असादुरजमान बारेनाओले सर्वाधिक ३० रन जोडे । एपीएफका लागि भुवन कार्की र प्रदिप ऐरीले समान दुई–दुई विकेट हात पारे । 

समूह ‘बी’ मा रहेको एपीएफले तीन मध्ये एक खेलमा जित हात पारेको हो । यता ट्यालेन्ट हन्टले सबै तीन खेलमा पराजय भोग्यो । त्रिभुवन आर्मी क्लब र उत्तर प्रदेश सेमिफाइनलमा प्रवेश गरिसकेका छन् ।