सिरिज विजेता क्रिकेट टिमलाई सरकारले पुरस्कृत गर्ने

काठमाडौँ – त्रिवि क्रिकेट मैदानमा त्रिकोणात्मक टी–ट्वान्टी अन्तर्राष्ट्रिय क्रिकेट सिरिजको उपाधि जितेको नेपाली क्रिकेट टिमलाई सरकारले पुरस्कृत गर्ने भएको छ । 

बुधबार बसेको मन्त्रिपरिषद बैठकले सिरिज जित्ने टिमका खेलाडीलाई जनही २ लाख नगद पुरस्कार प्रदान गर्ने निर्णय गरेको हो । टिममा १६ खेलाडी रहेका थिए । 

---

बैठकले प्रशिक्षक पुबुदु दासानायकेलाई १ लाख ५० हजार तथा अन्य पदाधिकारीलाई जनही १ लाख प्रदान गर्ने पनि निर्णय गरेको छ । युवा तथा खेलकुद मन्त्रालयले गरेको प्रस्तावलाई मन्त्रिपरिषदले अनुमोदन गरेको हो । 

चैत २१ गते पपुवा न्युगिनीलाई ५० रनले पराजित गर्दै नेपालले उपाधि जितेको थियो । सिरिजमा नेपाल, पीएनजी र मलेसियाको सहभागिता रहेको थियो ।