प्रो क्लब क्रिकेटः मलेसिया ११ र रुपन्देही सेमिफाइनलमा

काठमाडौँ – मलेसिया ११ र रुपन्देही ११ प्रो क्लब च्याम्पियनशीप क्रिकेटको सेमिफाइनलमा प्रवेश गरेका छन् । बुधबार पुस स्पोर्टस दिल्लीले रुपन्देहीलाई ४ विकेटले पराजित गरेपनि मलेसिया र रुपन्देही समूह ‘ए’ बाट विजेता र उपविजेताको रुपमा अन्तिम चारमा प्रवेश गरेका हुन् । मलेसिया, रुपन्देही र पुस स्पोर्टसले समान ४–४ अंक जोडेपनि नेट रनरेटमा भने पुस स्पोर्टस पछि पर्यो । 

समूह चरणको अन्तिम खेलमा पुस स्पोर्टसले १ सय ४ रनको लक्ष्य १८ ओभरमा ६ विकेट गुमाएर पुरा गरेपनि त्यो सेमिफाइनलका लागि पर्याप्त भएन । पुस स्पोर्टसका लागि विशेष सारोहाले सर्वाधिक २६ रन जोडे । रुपन्देहीका विक्रम भुषाल र विशाल विक्रम केसीले समान दुई–दुई विकेट हात पारे । 

---

यस अघि टस जितेर ब्याटिङ गरेको रुपन्देहीले निर्धारित २० ओभरमा अलआउट हुदै १ सय ३ रन जोड्यो । उसका लागि विशाल विक्रम केसीले सर्वाधिक २९ रन जोडे । पुस स्पोर्टसका हर्सवर्धन फोगाट, प्रणय प्रसाद, विशेष सारोहा, स्पर्श र मयंक गुप्ताले समान दुई–दुई विकेट लिए ।