लिभरपुल च्याम्पियन्स लिगको फाइनलमा

काठमाडौँ - इंग्लिस फुटबल क्लब लिभरपुल च्याम्पियन्स लिगको फाइनलमा प्रवेश गरेको छ । सेमिफाइनलको दोस्रो लेगमा लिभरपुलले स्पेनिस क्लब भियारियललाई ३-२ ले पराजित गर्दै फाइनलमा स्थान सुरक्षित गरेको हो ।

यस अघि पहिलो लेग २-० ले जितेको लिभरपुलले समग्रमा ५-२ को नतिजासँगै अन्तिम दुईको यात्रा तय गरेको हो ।

---

दोस्रो लेगमा लिभरपुललाई जित दिलाउन फाविन्हो, लुइस डियाज र साडियो मानेले एक-एक गोल गरे । भियारियलका लागि बौलायी डिया र फ्रानसिस्को कोकुलिनले एक-एक गोल गरे ।

खेलको तेस्रो मिनेटमै गोल गर्दै डियाले भियारियललाई अग्रता दिलाए भने कोकुलिनले ४१ औं मिनेटमा गोल गर्दै भियारियलको अग्रता दोब्बर बनाए ।

तर दोस्रो हाफमा भने १२ मिनेटभित्रै लिभरपुलले लगातार तीन गोल गर्दै खेल आफ्नो पक्षमा पार्न सफल भयो । फाविन्होले ६२ औं, डियाजले ६७ औं र मानेले ७४ औं मिनेटमा गोल गर्दै लिभरपुललाई फाइनल पुर्याए ।

लिभरपुलले अब फाइनलमा म्यानचेस्टर सिटी र रियल म्याड्रिडबीचको विजेतासँग खेल्ने छ ।