भलिबल लिग: महिलातर्फको उपाधि आर्मीलाई

काठमाडौँ - छैटौं संस्करणको आरबीबी-एनभीए राष्ट्रिय महिला तथा पुरुष क्लब भलिबल लिग अन्तर्गत महिलातर्फको उपाधि त्रिभुवन आर्मी क्लबले हात पारेको छ ।

त्रिपुरेश्वरस्थित राष्ट्रिय खेलकुद परिषदको कभर्डहलमा शनिबार भएको महिलातर्फको अन्तिम खेलमा विभागीय टोली नेपाल पुलिस क्लबलाई ३-० को सोझो सेटमा पराजित गर्दै आर्मीले उपाधि जितेको हो । आर्मीले पुलिसलाई २५-१८, २५-२३ र २५-२० को सेटमा पाखा लगायो ।

---

पुलिस भने उपविजेता बन्दा नेपाल एपीएफ क्लब भने तेस्रो तथा एभरेष्ट चौंथो स्थानमा रह्यो ।

विजेता आर्मीले ६ लाख, उपविजेता पुलिसले ३ लाख, तेस्रो बनेको एपीएफले १ लाख ५० हजार र चौंथो भएको एभरेष्टले ७५ हजार प्राप्त गर्यो ।