नेपाल रेल्वेले गर्‍यो दोस्रो चरणको रेल ट्रयाक परीक्षण

जनकपुरधाम । नेपाल रेल्वेले दोस्रो चरणको कुर्थादेखि बिजलपुरासम्मको रेल्वे ट्रयाक परीक्षण गरेको छ । निर्माण कार्य सम्पन्न भएपछि बिहीबार जनकपुरधामको कुर्थादेखि महोत्तरीको बिजलपुरासम्म १७ किलोमिटर गुडाएर रेल परीक्षण गरेको हो ।

पहिलो चरणमा भारतको जयनगरदेखि जनकपुरधामको कुर्थासम्म गएको चैत २० गते ३५ किलोमिटरको दूरीमा रेल परिक्षण गरेको थियो । जुन गत ५ महिनादेखि सञ्चालनमा रहेको छ ।

---

नेपालका प्रधानमन्त्री शेरबहादुर देउवा र भारतका प्रधानमन्त्री नरेन्द्र मोदीले हरियो झण्डा देखाएर संयुक्त रुपमा उद्घाटन गरे पश्चात पहिलो चरणको रेल परीक्षण गरिएको थियो ।

दोस्रो चरणको परीक्षण अन्तर्गत बिहीबार बिहान १० बजेदेखि ३ बजेसम्म दुई पटक १७ किलोमिटर ३० र १०० को गुडाएर रेल्वे ट्रयाक परीक्षण गरिएको हो । तर रेलवे निर्माण कम्पनीले स्वामित्व हस्तान्तरण गरेपछि नियमित रुपमा रेल संचालन ल्याइने नेपाल रेल्वे कम्पनीका महाप्रबन्धक निरञ्जन झाले जानकारी दिए ।

उनले भने ‘आज ट्रयाक परिक्षण गरिएको हो । पानी, बिजुली र भवनसहितका निर्माण कार्य सम्पन्न पश्चात निर्माण कम्पनी भारतीय कम्पनी इरकानले नेपाल रेल्वेलाई स्वामित्व हस्तान्तरण गरेपछि सो खण्डमा नियमित रुपमा रेल सञ्चालन हुनेछ ।’

तत्काल कम्पनीसँग दुईवटा रेलको मात्र ईन्जन र बोगी रहेको छ जुन जयनगर—कुर्थासम्म संचालनमा रहेको हो । महाप्रबन्धक झाले भने ‘हामीले थप रेल माग गरेका छौं तर अहिले सम्भव देखिदैन । जबसम्म नयाँ रेल उपलब्ध हुँदैन तबसम्म यही दुईवटा रेलबाट म्यानेज गर्नेछौं ।’

तेस्रो चरणको बिजलपुरा–बर्दिबासको खण्डमा १७ किलोमिटरको निर्माण कार्य पनि जारी रहेको छ । ट्रयाक र हाल्टको काम तीव्र गतिमा भइरहेपनि पनि बर्दिबास स्टेशनको केही ठाउँमा जग्गा मुआब्जा विवाद कारण काम हाल रोकिएको छ ।