मलेसियाका ६५० बढी ठाउँमा नेपालको पर्यटकीय क्षेत्रको प्रचारप्रसार हुने

काठमाडौँ - नेपालको पर्यटकीय क्षेत्रको प्रचारप्रसार अब मलेसियाका ६५० बढी ठाउँमा हुने भएको छ । नेपाल पर्यटन बोर्डले मलेसियाको ठूलो चेन भएको केके सुपरमार्टसँग सम्झौता गर्दै त्यहाँका ६५० बढी ठाउँमा नेपालका पर्यटकीय क्षेत्रको प्रचारप्रसार सामग्री प्रसारण हुने भएको हो ।

केके सुपरमार्ट मलेसियाको ठूलो चेन मार्ट हो । जहाँ लाखौँ ग्राहक किलमेलका लागि पुग्ने गरेका छन् । मलेसियाका ६५० भन्दा बढी ठाउँमा शाखा विस्तार गरेको केके सुपरमार्टले छिट्टै कम्तीमा एक हजार वटा आउटलेट खोल्ने महत्वाकांक्षा राखेको छ ।

---

नेपाल पर्यटन बोर्डले मलेसियाका ठूलो चेनमार्ट केके सुपरमार्टसँग नेपालका पर्यटकीय क्षेत्रको प्रचारप्रसार गर्ने सम्झौता गरेको छ । बुधबार मलेसियामा नेपाल पर्यटन बोर्डका सीइओ डा.धनन्जय रेग्मी र मलेसियाका सुपरमार्टका दतुक श्री डा.केके चाईबीच सम्झौतापत्रमा हस्ताक्षर भएको हो ।

सम्झौताअनुसार केके सुपरमार्टले आफ्नो सबै आउटलेटहरूमा नेपालका पर्यटकीय क्षेत्रको प्रचारप्रसारका लागि भिडियो तथा फोटो प्रदर्शन गर्नेछ । यसका लागि बोर्डले केके सुपरमार्टलाई नेपालका पर्यटकीय क्षेत्रबारे बनाइएको भिडियो तथा फोटो उपलब्ध गराउनेछ ।

केके सुपरमार्टले आफ्नो डिजिटल बोर्ड तथा फ्लेक्समा नेपालका पर्यटकीय क्षेत्रको फोटो तथा भिडियो राख्नेछ । जसकारण किनमेल गर्न आउने हजारौँ ग्राहकले अब नेपालका सुन्दर पर्यटकीय क्षेत्र हेरेर नेपाल घुम्न आउन सक्नेछन् । मलेसियाका धेरै पर्यटक थाइल्याण्ड, युरोप र अमेरिका पुग्ने गरेका छन् । नेपालमा उनीहरू कमै आउने गर्छन् ।

नेपालको हिमाल, पहाड तथा तराईमा रहेका सुन्दर पर्यटकीय गन्तव्यका बारेमा थाहा पाएपछि उनीहरू नेपाल आउने बोर्डका सीइओ डा.रेग्मीको भनाई छ । ‘नेपालका पर्यटकीय ठाउँहरू सुन्दर छन् । युरोप अमेरिकाभन्दा पनि राम्रा र विशेष खालका पर्यटकीय गन्तव्य नेपालमा छन्’ बोर्डका सीइओ डा.रेग्मीले टेलिफोनमा भने, ‘यसका लागि मलेसियाका पर्यटनमन्त्रीसहित ठूलो स्केलमा मानिसहरूले किनमेल गर्ने केके सुपरमार्टसँग सम्झौता गरेका छौँ ।

यो सम्झौता र प्रचारले अब नेपालमा मलेसियाका पर्यटक बढ्छन् ।’ डा.रेग्मीसँगको कुराकानीमा मलेसियाका पर्यटनमन्त्री किङ सिङले वार्षिक एक लाख पर्यटक नेपाल घुम्न जाने बताएका छन् । यसका लागि आफूले वातावरण मिलाउने मलेसियाका पर्यटनमन्त्रीले बताएका छन् ।

सन् २००१ मा स्थापना भएको केके सुपरमार्ट मलेसियाको ठूलो चेन मार्ट हो । जसका लाखौँ ग्राहक छन् । आगामी दिनमा ग्राहकहरूले प्रत्यक्ष हातमा नै नेपालका पर्यटकीय क्षेत्रको फोटो तथा विशेष सामग्री पाउने गरि बोर्डसँग सम्झौता हुने पत्रमा उल्लेख छ ।

नेपालका पर्यटकीय क्षेत्रको भ्रमण प्याकेज ‘नेपाल सेल्स मिसन’ लिएर बोर्डका सीइओ डा.रेग्मीसहित नेपालका पर्यटन व्यवसासीसहितको टोली मलेसिया पुगेको हो ।

टोलीले क्वालालाम्पुर र पेनाङमा नेपाल सेल्स मिसन अन्तर्गत कार्यक्रम पनि सम्पन्न गरेको छ । टोलीमा पर्यटन बोर्डका सीइओ रेग्मी, पर्यटन मन्त्रालयका सचिव सुरेश अधिकारी, पर्यटन व्यवसायी, नाट्टाका महासचिव कुमार थपलिया, नाट्टा बाँके च्याप्टरका अध्यक्ष श्रीराम सिग्देल लगायत छन् ।