निगमका जहाजमा समस्याः तीनवटा जहाजले आठ मुलुकको उडान भर्दा यात्रु समयमै पुग्दैनन् गन्तव्यमा

काठमाडौँ- गत बिहीबार राति नेपाल वायु सेवा निगमको जहाज ‘आयल फिल्टर’ मा समस्या देखिएपछि न्यारोबडी दिल्लीबाट समयमा उडान हुन सकेन । जहाजले बढी तेल खाने समस्या देखा परेपछि उडान हुन नसकेको जहाज भने आइतबार उडान भरेको थियो ।

समयमा उडान हुन नसक्दा निगमका जहाजबाट टिकट काटेका यात्रुहरू अलपत्र परेका थिए । विमानस्थलमा यात्रुले घण्टौं पर्खनु परेको थियो । जसले गर्दा निगमको व्यवस्थापन फितलो र सरकारको उपस्थिति कमजोर देखिन्छ ।

---

हाल नेपाल वायुसेवा निगमको अन्तर्राष्ट्रिय उडानका लागि तीन वटा जहाज छन् । जापान, कतार, मलेसिया, दुबई, भारत, थाइल्याण्ड, हङकङ र साउदी अरब लगायतका मुलुकमा नियमित उडान गर्छ ।

निगमका जहाजको सबैभन्दा बढी उडान दिल्लीमा रहेका छन् । दिल्लीको सातामा ७ दिन उडान रहेको छ । कतार, दुबई, मलेसियाको सातामा ४ वटा उडान रहेको छ ।

हाल निगमसँग अन्तर्राष्ट्रिय उडान गर्न तीन वटा जहाज छ । २ वटा न्यारोबडी १५८ सीट र वाइडबडी २७४ सीट क्षमता रहेको छ । केही समयअघि २७४ सिटको वाइडबडी मर्मतका लागि इटालीमा छ । जहाजको सि चेकका लागि इटालीमा लगिएको हो ।

घण्टौंसम्म यात्रुहरू विमानस्थलमा अलपत्र पर्दा समयमा गन्तव्यमा पुग्न पाउँदैनन् । जहाजको संख्या कम हुँदा निगमका यात्रुहरू मारमा पर्ने गरेका छन् । आखिर समय-समयमा निगमका जहाजहरू किन बिग्रन्छन् ?

जहाजमा प्राविधिक समस्या हुने भएकाले समय-समयमा उडानमा समस्या आउने निगमका प्रवक्ता रमेश पौडेल बताउँछन् । उनका अनुसार कहिलेकाहीँ आकस्मिक प्राविधिक समस्या आउन सक्छ । समयमा यात्रुले गन्तव्यमा पुग्न पाउँदैनन् । अहिले भने निगमका तीन वटा जहाजले नियमित उडान भर्न सुरु गरिसकेका छन् ।

‘निगमसँग थोरै जहाज रहेकाले पनि उडानमा समस्या आउने गर्छ । निगमसँग भएका चार वटा जहाजलाई पर्याप्त मान्न सकिन्न,’ उनी भन्छन्,’  एउटा जहाज बिग्रेर मर्मतका लागि लगिएको छ । तीन वटा जहाज उडानमा छन् । यसलाई पर्याप्त मान्न सकिने अवस्थामा निगम छैन ।‘

सरकारले निगमका लागि थप जहाज खरिद नगरेसम्म समय-समयमा विमानस्थलमा यात्रुले समस्या भोगिरहनु पर्ने प्रवक्ता पौडेलको भनाइ छ । निगमसँग कम्तीमा दश वटा जहाज भएको भए यात्रुले समयमा उडान भर्न पाउने उनले दाबी गरे ।

उडानका लागि ब्याक अप नहुँदा उडानमा समस्या पर्ने गरेको उनको ठहर छ । ‘निगमसँग जहाजको संख्या थोरै हुनु नै मुख्य समस्या हो,’ उनले अगाडि थपे ।

अन्तर्राष्ट्रिय एयरलाइन्स कम्पनीले समयमा उडान भर्न नसक्दा यात्रुलाई उक्त समयभर आफ्नो खर्चले खाने बस्ने व्यवस्था गर्ने गरेको छ । नेपाल वायुसेवा निगमले वार्षिक रुपमा पनि भैपरी आएको खण्डमा यात्रुलाई व्यवस्थापन गर्न २०-३० वटा होटल बुक गरेर राखेको छ ।

होटल बुक गर्न वार्षिक कति खर्च गरिएको छ भन्ने इकागज प्रश्‍नमा उनले भने,’ रकम खुलाउन जरुरी छैन । यात्रुलाई गन्तव्यमा जसरी पनि पुर्‍याउँछौ । निगमको जहाज भए निगमकै नत्र भने अरु एयरलाइन्सको टिकट काटेर पनि पठाउने गरेका छौ ।‘

न्यारोबडी उडान नहुँदा मासिक करोडौँ क्षति

दैनिक निगमलाई एउटा न्यारोबडी उडाउन नसक्दा दैनिक १ करोड भन्दा बढी घाटा छ । मर्मतका लागि लगिएको वाइडबडी झण्डै चार महिना हुन लाग्दा पनि न्यारोबडी नेपाल आउन सकेको छैन । एउटा वाइडबडी ग्राउन्डेड हुँदा मासिक ३० करोड नोक्सान हुने गरेको छ ।

यसअघि दुई वटा वाइड बडीमध्ये ‘ए३३०–२००’ सिरिजको दर्ता नम्बर ‘९एन–एएलवाई’ जहाज नियमित मर्मत (सी-चेक) गर्न विना अनुमति युरोपको इटाली लगेको प्राधिकरणले बताइ सकेको छ । २३० सिट क्षमताको जहाज मर्मतका लागि लगिएको हो

इटालीबाट मर्मत गरेर २५ अक्टोबर सम्ममा नेपाल आइपुग्ने प्रवक्ता पौडेलले जानकारी दिए । उनका अनुसार इटालीको एटिटेक भन्ने जहाज मर्मत कम्पनीमा निगमले आफ्नो वाइड बडी जहाज मर्मत गरिरहेको छ ।

साना जहाज खरिद प्रक्रिया किन अगाडि बढेन ?

निगमले तीन वटा जहाज खरिद गर्ने पक्रिया अगाडि बढाए पनि हालसम्म पूरा गर्न सकेको छैन । साना तीन वटा जहाज करिब तीन अर्ब रुपैयाँमा खरिद गर्न लागेको हो । जसलाई निगमले आन्तरिक उडान गराउन तयार गरेको थियो ।

तर, सरकार परिवर्तन र विभिन्न कानुनी झमेला देखाउँदै खरिद प्रक्रिया अगाडि बढ्न नसकेको निगमका एक कर्मचारी बताउँछन् ।

तत्कालीन संस्कृति, पर्यटन तथा नागरिक उड्डयन मन्त्री सुदन किरातीको पालामा निगमले जहाज खरिद गर्ने प्रस्ताव अगाडि बढाएको थियो । मन्त्री राईको स्वागत कार्यक्रममा कार्यकारी अध्यक्ष अधिकारीले सरकारले निर्देशन दिएमा जहाज खरिद प्रक्रिया अगाडि बढाउने बताएका थिए । 

निगमले किनेको चिनियाँ जहाज विमानस्थलमा त्यसै थन्किएका छन् । अहिले निगम चलाए पनि घाटामा र नचलाए पनि घाटामा जानेछ । उक्त जहाज नेपाल सरकारले चीन सरकारसँग खरिद गरेको थियो ।