मिथिलाको पर्यटकीय र व्यवसाय प्रवर्द्धनका लागि महोत्सव

जनकपुरधाम - जनकपुरधामसहित मिथिला क्षेत्रको पर्यटकीय र व्यवसाय प्रवर्द्धन गर्ने उद्देश्यले सप्ताहव्यापी श्री मिथिला महोत्सव आयोजना हुने भएको छ।

आइडिया पिक्सलको आयोजना र जनकपुरधाम उद्योग वाणिज्य संघको सह आयोजनमा जनकपुरधामको बारह विग्घा मैदानमा चैत २४ गतेदेखि ३० गतेसम्म हुन लागेको सो मिथिला महोत्सवमा पर्यटकीय क्षेत्रसहित स्थानीय उत्पादनको संरक्षण, प्रवर्द्धन र विकासको उद्देश्य रहेको जनाइएको छ ।

---

महोत्सवमा सातै दिन भारत सहित नेपाल तथा मिथिला क्षेत्रका चर्चित कलाकार र गायकहरुको प्रस्तुतिमा सांस्कृतिक कार्यक्रम, मधेशका प्रमुख खेल पहलमानीका साथै झुला लगायका विभिन्न मनारोञ्जनात्मक कार्यक्रमहरु आयोजना गरिने र महोत्सवको अनुमानित लागत ९४ लाख रुपैया रहेको आयोजक संस्था आइडिया पिक्सलका अध्यक्ष पवनराज जोशीले बुधवार एक पत्रकार सम्मेलन आयोजना गरी जानकारी दिएका छन ।

उक्त महोत्सवमा जनकपुरधामका ठुला, मझौला र साना उद्योगका उत्पादन सहित स्थानीय उत्पादनको ग्राहयता हुनेगरी स्थानीय उद्योगी व्यवसायीहरुको सयौं स्टल राखिने जनकपुरधाम उद्योग बाणिज्य संघका अध्यक्ष जितेन्द्र महासेठले बताए ।

उनले भने, 'यो महोत्सवले यहाँका धार्मिक पर्यटकीय क्षेत्र सहित स्थानीय उद्योगी व्यवसायी र उत्पादनको विकास तथा प्रवर्द्धन हुनेछ । महोत्सवमा जनकपुरधामसहित मिथिला क्षेत्रका पर्यटकीय स्थल तथा देवी देवताहरुको अवलोकन गर्ने फोटो प्रदर्शनी समेत गरिने आयोजकले जानकारी दिएका छन ।

महोत्सवमा सन्दिप क्षेत्री, शिव परियार, सुगम पोखरेल, कमल खत्री, अनिल सिंह, प्रमोद खरेल, शुनिल पण्डित सहित नेपाल तथा मिथिलाका प्रमुख कालाकारहरुको प्रस्तुति हुने अध्यक्ष जोशीले जानकारी दिए ।