भागेर कहाँ गए श्रीलंकाका राष्ट्रपति ? राष्ट्रपति उम्मेदवार बन्‍नुअघि त्यागेका थिए अमेरिकी नागरिकता

कोलम्बो- श्रीलंकाका राष्ट्रपतिले देश छाडेका छन् । आर्थिक संकटलाई लिएर व्यापक प्रदर्शन भइरहेका बेला राष्ट्रपति गोटाबाया राजापाक्षे बुधबार बिहान सेनाको एउटा विमानमा चढेर देश छाडेका हुन् ।

७३ वर्षीय गोटाबाय स्थानीय समयअनुसार बिहान ३ बजे माल्दिभ्सको राजधानी माले पुगेको बीबीसीले जनाएको छ । कोलम्बोको अन्तर्राष्ट्रिय विमानस्थलबाट उडेको श्रीलंकाको सैन्य विमान एन्टोनोभ-३२ मार्फत देश छाडेका हुन् । विमानमा राजापाक्षे, उनकी श्रीमती र एक अंगरक्षकसहित चार यात्रु रहेका छन् ।

---

पदमा रहँदा अभियोगबाट उन्मुक्ति पाएका यी नेता पदमुक्त भएपछि नयाँ प्रशासनको गिरफ्तारीबाट बच्न विदेश भागेको ठानिएको छ । राजपाक्षेको प्रस्थानले श्रीलंकामा दशकौंसम्म शासन गर्ने पारिवारिक वंशको अन्त्य गरेको छ । शनिबार उनको निवासमा भीडले आक्रमण गरेपछि उनी लुकेर बसेका थिए । 

उनले सोमबार राति दुबई भाग्ने प्रयास गरेका थिए । तर उनलाई अध्यागमनका अधिकारीहरूले राहदानीमा छाप लगाउन विमानस्थलको भीआईपी कक्षमा जानबाट रोकेका थिए । अन्तत उनको दुबई भाग्‍ने प्रयास सफल हुन सकेन ।

हुनत देश छाडेर भाग्‍ने उनको प्रयास यो पहिलो पटक भने होइन् । यसअघि पनि उनले देश छाड्‍ने प्रयास गरेका थिए । देश छाड्‍ने प्रयास गरे पनि उनलाई भारतले श्रीलंकाको सैन्य विमान अवतरण गर्न अनुमति दिएन । त्यस्तै अमेरिकी दूताबासले उनलाई भ्रमण भिसा दिन अस्वीकार गरेको थियो ।

त्यसो त अमेरिकामा उनको एक छोरा र नातिनातिना छन् । श्रीलंकामा राष्ट्रपतिको उम्मेदवार बन्नुअघि अमेरिका बसेका उनले राष्ट्रपतिको उम्मेदवार बन्न उनले अमेरिकी नागरिकता त्यागेका थिए ।

राष्ट्रपतिले यसअघि १३ जुलाई अर्थात आज राजीनामा दिने वाचा गरेका थिए । उनका भाइ पूर्वअर्थमन्त्री बसिल राजापाक्षेले पनि देश छाडेको बीबीसीले जनाएको छ ।