फिलिपिन्समा वार्षिक मृत्युदर बढ्‍यो

मनिला- फिलिपिन्समा वार्षिक मृत्यु दर ४३ प्रतिशतको दरले वृद्धि भएको पाइएको छ । 

गत सन् २०२१ मा आठ लाख ७९ हजार ४२९ जनाको मृत्यु भएको विवरण सरकारी अधिकारीहरूले बुधबार सार्वजनिक गरेका छन् । यो सङ्ख्या अहिलेसम्मकै सबैभन्दा धेरै भएको पनि उनीहरूको दावी छ । 

---

अघिल्ला वर्षहरूको तुलनामा सन् २०२१ मा यति धेरै मानिसको मृत्यु हुनुमा कोरोना भाइरसको महामारी नै मुख्य कारण रहेको अधिकारीहरूले जनाएका छन् । 

फिलिपिन्सको तथ्याङ्क प्राधिकरणले सार्वजनिक गरेको विवरण अनुसार सामान्यतयाः अन्य वर्षहरूमा एकदेखि पाँच प्रतिशतसम्म मृत्युदर वृद्धि हुने गरेको थियो ।

यसअघि सन् २०१९ मा छ लाख २० हजार ४१४ जनाको मृत्यु भएको थियो । त्यसका आधारमा दैनिक औसतमा एक हजार सात सयको मृत्यु हुने गरेको देखिएको थियो । त्यो दैनिक औसत सङ्ख्या सन् २०२१ मा भने दुई हजार चार सयभन्दा बढी देखिएको छ । 

मृत्युको मुख्य कारण कोरोना भाइरस नै भएपनि अन्य रोगहरूका कारणले मृत्यु हुनेहरूको सङ्ख्या पनि धेरै देखिएको छ । दोस्रो धेरैमा हृदयघात देखिएको छ भने मस्तिष्कघात, मधुमेह, मानसिक तनाव लगायतका कारणले पनि धेरैको मृत्यु हुने गरेको पाइएको छ । (सिन्ह्वा)