पूर्वराष्ट्रपति ट्रम्प भन्छन्, ‘अमेरिका नर्कमा जाँदैछ’

काठमाडौँ- अमेरिकाका पूर्वराष्ट्रपति डोनाल्ड ट्रम्पले अमेरिका नर्कमा जाँदै गरेको बताएका छन् । सन् २०१६ को निर्वाचनअघि आफूविरुद्धको जानकारी लुकाउन झुटा व्यापारिक दस्तावेज तयार पारेको विषयमा आफू दोषी नभएको दावी गर्दै ट्रम्पले अमेरिका नर्कतर्फ जाँदै गरेको बताए ।

बीबीसीले उल्लेख गरेअनुसार म्यानहटनको अदालतमा उनीमाथि ३४ वटा आरोप लगाइएको थियो । जसमा आफूविरुद्ध नबोल्नका लागि ‘पोर्न स्टार’ स्टोर्मी ड्यानियल्सलाई ठूलो रकम दिएको आरोप पनि रहेको छ ।

---

अपराधिक मुद्दा खेप्ने ट्रम्प पहिलो अमेरिकी पूर्वराष्ट्रपति हुन् ।

‘मैले एउटा मात्र अपराध गरेको भनेको निर्भिकतापूर्वक अमेरिकालाई तहसनहस पार्नेबाट बचाउनु हो,’ अदालतमा उपस्थित भएपछि आफ्नो घरमा समर्थकहरुलाई सम्बोधन गर्ने क्रममा ट्रम्पले भने ।

उनले आगामी वर्षको राष्ट्रपतीय निर्वाचनमा आफू उम्मेदवार बन्ने भएपछि त्यसलाई प्रभावित पार्न डेमोक्रयाटिकले षड्यन्त्र गरेको समेत आरोप लगाए ।