अमेरिकाको बाल्टिमोरमा गोली चल्दा दुईको मृत्यु, दर्जनौँ घाइते

वासिङ्टन - अमेरिकाको बाल्टिमोर शहरमा आइतबार भएको गोलीकाण्डमा कम्तीमा दुई जनाको मृत्यु भएको छ भने २८ जना घाइते भएका छन् । 

मेरिल्याण्ड राज्यको ब्रुकलिन नजिकैको एक सडकमा आइतबार राति १२ः३० बजेपछि गोली चलेको सूचना प्रहरीलाई प्राप्त भएको कार्यवाहक प्रहरी आयुक्त रिच वोर्लेले पत्रकार सम्मेलनमा जानकारी दिए । 

---

वोर्लेले भने, “अधिकारीहरू आएपछि हामीले गोली लागेर घाइते भएका थुप्रै व्यक्तिहरू फेला पारेका थियौं ।”

घटनास्थलमा १८ वर्षीया एक महिलाको शव फेला परेको छ भने २० वर्षीय पुरुषको पनि मृत्यु भएको पुष्टि भएको प्रहरीले जनाएको छ । 

घाइतेको इलाका अस्पतालमा उपचार भइरहेको र तीमध्ये तीन जनाको अवस्था गम्भीर रहेको उनले बताए ।  

वोर्लेका अनुसार अधिकारीहरूले शंकास्पद व्यक्तिको पहिचान गर्न र गोली चलाउनुको कारण पत्ता लगाउन अनुसन्धान गरिरहेका छन् । 

“यो एक कडा प्रबृतिको आपराधिक दृश्य हो, हाम्रा जासुसहरू केही समय यहाँ बसेर यसको अनुसन्धान गर्नेछन्,” उनले भने । 

बाल्टिमोरका मेयर ब्रान्डन स्कटले घटनास्थलमा पत्रकारसँग कुरा गर्दै गोली काण्डको निन्दा गरेका छन् । उनले भने, “यो हुँदै हुन नहुने नितान्त त्रासदीपूर्ण घटना हो ।”

स्कटले भने, “यसले हाम्रो सडकमा अवैध बन्दुकको अत्यधिक प्रसारको प्रभाव र सामना गर्ने आवश्यकतालाई फेरि उजागर गरेको छ । 

‘गन भायलेन्स आर्काइभ (जीभीए)’ का अनुसार सन् २०२२ मा ४४ हजार ३५७ जनाको गोली लागि मृत्यु भएको छ, जसमध्ये २४ हजार ९० जनाले आत्महत्या गरेका हुन् । 

जीभीएका अनुसार आइतबारको सामूहिक गोलीकाण्ड यस वर्ष जानकारीमा आएको ३३७ औँ घटना हो । अमेरिकामा चार वा सोभन्दा बढी व्यक्ति गोली लागि घाइते वा मारिएका छन् भने यसलाई सामुहिक गोलीकाण्ड मानिन्छ ।