अमेरिकी उत्पादन क्षेत्रमा नवौं महिना सङ्कुचन

वासिङटन- अमेरिकी उत्पादन क्षेत्रमा जुलाईमा लगातार नवौं महिना सङ्कुचन देखिएको मङ्गलबार सार्वजनिक एक सर्वेक्षणको तथ्याङ्कले देखाएको छ ।

आपूर्ति व्यवस्थापन इन्स्टिच्युट (आईएसएम) को उत्पादन सुचकाङ्क जुनमा ४६.० प्रतिशत रहेकोमा गत महिना ४६.४ प्रतिशतमा झरेको छ र यसले संकुचनको सुस्त दरलाई सङ्केत गरेको थियो ।

---

आईएसएम सर्वेक्षण प्रमुख टिमोथी फियोरले भने, “माग कमजोर छ तर जूनको तुलनामा थोरै राम्रो छ, कामको कमीको कारण उत्पादन सुस्त भएको छ, र आपूर्तिकर्ताहरूसँग आपूर्ति क्षमता मजबुत छ ।”

उनले भने, “निकट भविष्यमा उत्पादनसँग राम्रो तालमेल गर्न थप रोजगारी कटौतीका सङ्केतहरू देखा परेका छन् ।

फेडरल रिजर्भको मौद्रिक नीतिमा कडाइले कम्पनीको खर्चमा पनि असर पारेको छ भने वस्तुको मागले उपभोगलाई सेवातर्फ मोड्न थालेपछि यो कमजोरी आएको हो ।

गत वर्ष बढ्दो मुद्रास्फितिलाई नियन्त्रण गर्न अमेरिकी केन्द्रीय बैंकले मागलाई सहज बनाउन ब्याजदर घटाउँदै आएको छ र यसको कार्यले विश्वको सबैभन्दा ठूलो अर्थतन्त्रलाई असर गरिरहेको छ ।

जुलाईको आईएसएम रिपोर्टले नयाँ अर्डरहरू र उत्पादन सूचकाङ्कहरू दुबैले केही सुधार सङ्केत गरेपनि उत्पादन सङ्कुचनमा रहेको देखिएको छ । 

पेट्रोलियम र कोइला उत्पादनका साथै फर्निचर र सम्बन्धित उत्पादनहरू गरी दुई उत्पादन उद्योगहरूमा जुलाईमा वृद्धि भएको छ भने अन्य १६ वटामा सङ्कुचन आएको छ ।

रासायनिक उत्पादन क्षेत्रका एक सर्वेक्षण उत्तरदाताले भने, “हाम्रो उद्योगमा बिक्री वर्षको उत्तराद्र्धसम्ममा पनि प्रगति अत्यन्तै सुस्त छ र कम्तिमा चौथो त्रैमासिकसम्म कुनै वृद्धि हुने अपेक्षा गरिएको छैन ।”

अर्का एक उत्तरदाताले चीनविरुद्ध सेमीकन्डक्टर व्यापार प्रतिबन्धले उत्तरी अमेरिकाको औद्योगिक व्यवसायमा ‘नकारात्मक प्रभाव’ पारेको उल्लेख गरे । 
यसैबीच, प्यान्थियन म्याक्रोइकोनोमिक्सका अर्थशास्त्रीहरूले हालैको एक रिपोर्टमा भनेका छन्, “चीनको बजार पुनः खुल्दा व्यापक रूपमा वृद्धि अपेक्षा गरिएकोमा यसो हुन सकेको छैन ।”

“सामान्यतया, हामी उत्पादन नतिजा सुधारका केही सङ्केतहरू देख्छौं,” प्यान्थियन अर्थशास्त्रीहरूले बताए । (एएफपी)