मध्य प्रदेश चुनाव : भारतीय कंग्रेसले १९ महिला उम्मेदवारको पहिलो सूची सार्वजनिक

नयाँदिल्ली- आगामी नोभेम्बर १७ मा हुने मध्य प्रदेश विधानसभा चुनावका लागि भारतीय कंग्रेस पार्टीले १४४ उम्मेदवारको सूची सार्वजनिक गरेको छ ।
 
प्रदेश अध्यक्ष कमलनाथले आफ्नो दलले १९ जना महिला उम्मेदवारलाई चुनावी मैदानमा उतारेको बताएका छन् । 

उनले भने, “हामी मध्य प्रदेशमा पूर्ण रूपमा तयार छौं । हामीले सार्वजनिक गरेको सूचीमा ६५ जना ५० वर्षभन्दा कम उमेरका उम्मेदवार र १९ जना महिला उम्मेदवार छन् । हामीले जे भनेका थियौं, त्यही गरेका छौं ।”

---

आगामी मध्य प्रदेश विधानसभा चुनावका लागि कंग्रेसले आइतबार १४४ उम्मेदवारको पहिलो सूची जारी गरेको छ, जसमा प्रदेश इकाई अध्यक्ष तथा पूर्व मुख्यमन्त्री कमलनाथलाई छिन्दवाडाबाट उम्मेदवार बनाइएको छ । 

यो सूचीमा मध्य प्रदेशका पूर्व मुख्यमन्त्री कमलनाथ, मध्यप्रदेशका पूर्व उच्च शिक्षा मन्त्री जितु पटवारी, जयवर्धन सिंह, मध्य प्रदेश विधान सभाका सदस्य विजयलक्ष्मी साधो र मध्य प्रदेश विधान सभाका सदस्य लक्ष्मण सिंहको नाम छ । 

सन् २०२१ को मार्चमा ज्योतिरादित्य सिन्धियाको नेतृत्वमा २२ जना कांग्रेस विधायकले राजीनामा दिएर भाजपामा प्रवेश गरेपछि कमलनाथ नेतृत्वमा रहेको सरकार ढलेको थियो । 

मध्य प्रदेशबाहेक छत्तीसगढमा ३० र तेलंगानामा ५५ सिटका लागि पनि पार्टीले उम्मेदवार घोषणा गरेको छ । 

सत्तारुढ भारतीय जनता पार्टी (भाजपा) ले राज्यका २३० विधानसभा निर्वाचन क्षेत्रमध्ये १३६ सिटका लागि उम्मेदवार घोषणा गरिसकेको छ । यो राज्यमा २३० विधानसभा निर्वाचन क्षेत्रबाट विधायकहरूको निर्वाचन हुनेछ । राज्यभर एक चरणमा हुने निर्वाचनको मतगणना डिसेम्बर ३ मा हुनेछ । (एएफपी)