रूसको चुनावमा हस्तक्षेप गर्नेलाई कडा सजाय दिने पुटिनको प्रतिबद्धता

मस्को- आगामी वर्षको निर्वाचनमा विदेशी हस्तक्षेप भएमा यसविरूद्धमा रूसले कठोर कदम लिने रूसी राष्ट्रपति भ्लादिमिर पुटिनले बताएका छन् । उनले विपक्षी नेताहले विदेशमा रहेर आफुविरूद्ध निर्वाचन अभियान चलाउन सक्ने सम्भावनालाई संकेत गर्दै विदेशमा बसी स्वदेशी अभियानलाई प्रभावित पार्न खोज्‍ने जो कोही पनि रूसी कानुनको कठघरामा उभिनुपर्ने चेतावनी दिएका छन् ।

संसद्‌को तल्लो सदन डुमामा पार्टीका नेताहरूसँगको भेटमा पुटिनले भने, 'रूसको आन्तरिक मामिलामा कुनै पनि हस्तक्षेपलाई रूसी कानुनअनुसार दण्डित र कठोर सजाय दिइनेछ ।'

---

उनले भने 'हामी हाम्रा जनताको स्वतन्त्रता, सार्वभौमिकता र आफ्नो भविष्य रोज्‍ने अधिकारको रक्षा गरिरहेका छौँ । हाम्रो देशमा शक्तिको स्रोत केवल रूसका जनता मात्र हुन् ।'

गत वर्ष युक्रेनको युद्धभूमिमा पश्चिमा प्रतिबन्ध र असफलताको सामना गर्नु परेका पुटिन सन् २०२३ को अन्त्यमा थप उत्साहित देखिएका छन् । पछिल्लो समय बहुचर्चित युक्रेनीप्रति आक्रमणले रूसी रेखाहरू तोड्न असफल भएको छ, अर्थव्यवस्था सुधार भइरहेको छ, र किभको लागि पश्चिमी समर्थन कमजोर भएको देखिन्छ, अमेरिकी कंग्रेस र युरोपेली संघमा नयाँ सहायता कार्यक्रमहरू रोकिएका छन् ।

पुटिनले पछिल्लो समय युक्रेनी सैनिकलाई कैदीका रूपमा पक्राउ गर्ने क्रम ह्वात्तै बढेको बताएका छन् । 

गत हप्ता उनले मार्च २०२४ को चुनावमा पाँचौं कार्यकालका लागि राष्ट्रपति पदका लागि आफुले उम्मेदवारी दिने घोषणा गरेका थिए । प्रभावशाली विपक्षी नेताहरू जेलमा रहेकाले लगभग २५ वर्ष सत्तामा रहेका पुटिनलाई आफ्नो विजय यात्रा सहज बनेको छ । 

विशेष गरी भ्रष्टाचार विरोधी अभियानकर्ता एलेक्सी नाभाल्नीलगायत अधिकांश प्रमुख रूसी विपक्षी नेताहरू जेलमा थुनिएका छन् वा निर्वासित जीवन बिताइरहेका छन् । (एएफपी)