‘सार्वजनिक नैतिकता’ उल्लंघन गरेको आरोपमा इरानकी एक महिलालाई ७४ कोर्रा सजाय

तेहरान- ‘सार्वजनिक नैतिकताको उल्लंघन’ गरेको आरोपमा इरानी अधिकारीहरूले एक महिलालाई ७४ पटक कोर्रा लगाएको र टाउको नढाकेकामा जरिवाना लगाएको न्यायपालिकाले बताएको छ । 

'दोषी रोया हेशमतीले तेहरानमा व्यस्त सार्वजनिक स्थानहरूमा अपमानजनक तरिकाले उपस्थित भएर उदारतालाई प्रश्रय दिएकी छन्,' न्यायपालिकाको मिजान अनलाइन वेबसाइटले शनिबार राति भनेको छ, 'सार्वजनिक नैतिकता उल्लंघन गरेको आरोपमा उनलाई ७४ कोर्रा हान्ने सजाय कानुन र शरियाअनुसार दिइएको थियो ।'

---

सन् १९७९ को इस्लामिक क्रान्तिको लगत्तैदेखि इरानमा सबै महिलाहरूका लागि आफ्नो गर्धन र टाउको ढाक्न कानुनले अनिवार्य गरेको छ । इरानमा ड्रेस कोडको उल्लंघनमा कोर्रा हान्नु असामान्य छन् । यद्यपि सन् २०२२ को अन्त्यमा सुरु भएको सरकार विरोधी प्रदर्शनका क्रममा उल्लंघनको अभ्यास बढेपछि अधिकारीहरूले नियमको अवहेलना गर्नेमाथि कडा कारबाही गरेका छन् । 

ती विरोध प्रदर्शनहरू सन् २०२२ सेप्टेम्बरमा महिलाहरूका लागि इस्लामिक गणतन्त्र इरानको कठोर ड्रेस कोडको कथित उल्लंघनको आरोपमा पक्राउ परेकी २२ वर्षीया इरानी कुर्द महसा अमिनीको हिरासतमा मृत्यु भएपछि सुरु भएको थियो । 

विरोध प्रदर्शनका क्रममा महिला प्रदर्शनकारीहरूले आफ्नो टाउकोबाट स्कार्फ उतारेर जलाइदिएका थिए । अन्य महिलाहरूले पनि ड्रेस कोडको उल्लंघन सुरु गर्न थाले । त्यसपछि कारबाही सुरु गरियो । 

कुर्द-केन्द्रित अधिकार समूह हेन्गावले हेशमतीको पहिचान कुर्द मूलकी ३३ वर्षीया महिलाका रूपमा गरेको छ । 'टाउकोमा स्कार्फ नलगाई सामाजिक सञ्जालमा तस्बिर प्रकाशित गरेको आरोपमा उहाँलाई अप्रिलमा पक्राउ गरिएको थियो,' उनका वकिल मजियार टाटाईले सुधारवादी शारग दैनिकलाई भने, 'सार्वजनिक रूपमा मुस्लिम बुर्का नलगाएकामा हेशमतीलाई एक करोड २० लाख रियाल (करिब २५ अमेरिकी डलर) को जरिवाना तिर्न पनि आदेश दिइएको थियो ।'

इरानी अधिकारीहरूले उल्लंघनमाथि निगरानी गर्न सार्वजनिक स्थानहरूमा निगरानी क्यामेरा लगाएका छन् र नियमको उल्लंघन गर्ने व्यवसायहरू बन्द गरिदिएका छन् । इरानको संसदले ड्रेस कोडको उल्लंघन गर्नेलाई कडा सजाय दिने विधेयकमाथि पनि छलफल गरेको छ । एएफपी