भारतको मणिपुरमा फेरि हिंसा भड्कियो, तीन सुरक्षाकर्मीसहित आठ जनाको मृत्यु

काठमाडौँ - भारतको मणिपुरमा पुनः हिंसा सुरु भएको छ । बिहीबार र बुधबार राति भएको हिंसामा पाँच सर्वसाधारण र तीन सैनिकको मृत्यु भएको छ ।

त्यसको एक दिनअघि बुधबार बिहान टेङ्नौपालमा ‘सशस्त्र चरमपन्थी’ले गरेको आक्रमणमा दुई प्रहरीको मृत्यु भएको थियो भने ६ जना घाइते भएका थिए ।

---

दुई दिने हिंसामा आठ जनाको मृत्यु भएको छ ।

बिहीबार राज्यका धेरै ठाउँमा हिंसात्मक प्रदर्शन भएको थियो। मणिपुरमा विगत आठ महिनादेखि जारी हिंसा रोकिने संकेत देखिएको छैन ।

बिहीबार मणिपुर प्रहरीले जानकारी दिँदै ट्विट गरेको छ- “जनवरी १८ मा विष्णुपुर जिल्लाको निङ्थौखोङ खा खुनोमा अज्ञात सशस्त्र चरमपन्थीहरूले चार सर्वसाधारणको हत्या गरेका थिए। घटनाको अनुसन्धान जारी रहेको र दोषीलाई पक्राउ गर्ने प्रयास भइरहेको छ ।"

यो ट्विटको केही समयपछि मणिपुर प्रहरीले अर्का नागरिकको हत्या भएको जनाएको छ ।

यसअघि १७ जनवरीमा प्रहरीले चरमपन्थीहरूले योजनाबमोजिम सुरक्षा बलहरूमाथि आक्रमण गरेको जनाएको थियो । जसमा मणिपुर राइफल्सका एक जवान, मणिपुर पुलिसको आईआरबी फोर्सका एक जवान र अर्का एक जवानसहित कुल तीन सुरक्षाकर्मीहरू मारिएका थिए। 

गत वर्ष मे महिनादेखि मणिपुरमा बहुसंख्यक मेइती समुदाय र आदिवासी कुकी-जो समुदायबीच जातीय हिंसा भइरहेको छ।

पछिल्लो आठ महिनामा कम्तीमा २०० जनाको मृत्यु भएको छ भने ५० हजारभन्दा बढी विस्थापित भएका छन् ।