चार लाख प्यालेस्टिनी उत्तरी गाजामा फसेको युएनआरडब्लुएका आयुक्तको भनाइ

गाजा- उत्तरी गाजा पट्टीमा कम्तिमा चार लाख मानिस फसेको निकट पूर्वमा प्यालेस्टाइन शरणार्थीका लागि संयुक्त राष्ट्रसङ्घीय राहत र कार्य एजेन्सी (युएनआरडब्लुए) का आयुक्त–जनरल फिलिप लाजारिनीले बुधबार बताएका छन् ।  

पछिल्लो समय इजरायली अधिकारीहरूले जारी गरेको निकासी आदेशले मानिसहरूलाई विशेष गरी जबलिया क्याम्पबाट बारम्बार भाग्न बाध्य पारेको उहाँले उल्लेख गरेका छन् ।

---

 गाजाको कुनै पनि ठाउँ  आफूहरुका लागि सुरक्षित छैन भन्ने थाहा पाएका प्रभावितहरूले आदेशको अस्वीकार गरिरहेको लाजारिनीले प्रेस विज्ञप्तिमार्फत जनाएका छन् ।  

उनका अनुसार कुनै आधारभूत आपूर्ति उपलब्ध नभएको कारण भोकमरी तथा रोगको  सङ्क्रमण फैलिरहेको छ  । 

युएनआरडब्लुए आयुक्तले युएनआरडब्लुए आश्रय र सेवाहरू बन्द गर्न बाध्य भइरहेको खुलासा गर्दै युद्ध सुरु भएपछि पहिलो पटक यस्तो अवस्था आएको उल्लेख गरेका छन् ।  

निरन्तरको इजरायली हमलाले गाजामा पोलियो खोप अभियानको दोस्रो चरणको कार्यान्वयनलाई समेत खतरामा पारेको  लाजारिनीले जनाएका छन् । (क्यूएनए)