गृहयुद्धताका प्रयोग भएको ग्रिनेड विस्फोट हुँदा २ बालकको मृत्यु

कम्बोडिया- कम्बोडियाको गृहयुद्धताका हवाई आक्रमणका लागि प्रयोग भएको ग्रिनेड घरनजिकै विस्फोट हुँदा त्यहाँ दुई बालकको मृत्यु भएको एक अधिकारीले आइतबार बताएका छन्।

सन् १९८० र १९९० को दशकमा कम्बोडियाली सरकारी सैनिक र खमेर रुज लडाकुका लागि युद्धस्थल रहेको उत्तरपश्चिमी सिम रिप प्रान्तको दुर्गम गाउँमा शनिबार विस्फोट भएको हो। मृत्यु हुनेमा दुई वर्षका एक बालक र एक बालिका छन्।

---

कम्बोडियन माइन एक्सन सेन्टर (सीएमएसी) का महानिर्देशक हेङ रतनाले एएफपीसँग भने, ‘अनुसन्धान प्रतिवेदनअनुसार दुई जना बालबालिका खेल्ने क्रममा जमिनमा माटो खनिरहेका बेला खन्ने औजारले ग्रिनेडलाई कोप्दा विस्फोट भएको र विस्फोटका कारण ती दुई बालकको ज्यान गएको छ।’

उनका अनुसार एक बालकको घटनास्थलमा नै मृत्यु भएको छ भने अर्का एक बालकको उपचारका क्रममा अस्पतालमा मृत्यु भएको छ।

‘कम्बोडियामा पूर्ण रूपमा युद्ध समाप्त भएको छ र २५ वर्षभन्दा बढी समयदेखि शान्ति छ तर बारुदी सुरङ र युद्धका अवशेषका कारण कम्बोडियाली जनताको रगत बगिरहेको छ,’ हेङ रतनाले भने।

अमेरिकी राष्ट्रपति डोनाल्ड ट्रम्पले ९० दिनका लागि विदेशी सहायता रोक्का गर्ने आदेश दिएपछि वासिङ्टनले अचानक आर्थिक सहयोग रोकेपछि कम्बोडियाले केही हप्ताका लागि डिमाइनिङ अपरेसन आंशिक रूपमा स्थगन गरेका समय यो दुर्घटना भएको हो।

शुक्रबार कम्बोडियाली अधिकारीहरूले अमेरिकाले देशमा कामका लागि वित्त पोषण जारी राख्न छुट प्रदान गरेपछि नफुटेका युद्ध सामग्री सफा गर्ने कामलाई निरन्तरता दिइनुपर्ने बारुदी सुरूङ सफाइ अधिकारीले बताएका छन्।

कम्बोडियामा सन् १९६० को दशकदेखि सुरु भएको दशकौँ लामो युद्धका बेला फ्याँकिएका गोलाबारुद र हातहतियार अहिले पनि व्यापक रूपमा भेटिने गरेका छन्।

सन् १९९८ मा ३० वर्षभन्दा लामो गृहयुद्ध अन्त्य भएपछि कम्बोडियामा विस्फोटक पदार्थ हटाउन विश्वको सबैभन्दा बढी समय लगानी गरी ती हतियारलाई उत्खनन गरिएको छ।

सन् १९७९ यता बारुदी हतियारका विस्फोटका कारण २० हजार जनाको मृत्यु भएको र त्योभन्दा दोब्बर घाइते भएको सरकारी तथ्यांकले देखाएको छ।

गत महिना कम्बोडियाको धानखेतबाट दशकौं पुरानो विस्फोटक पदार्थसहितको ट्यांकी हटाउने क्रममा दुई जना कम्बोडियाली अधिकारीको मृत्यु भएको थियो भने एक गाउँलेको खेतमा अलपत्र छोडिएको पुरानो बम विस्फोट हुँदा मृत्यु भएको थियो।

कम्बोडियामा करिब एक हजार ६०० वर्ग किलोमिटर (६२० वर्ग माइल) भन्दा बढी भूमि अझै सफा गर्न बाँकी छ जसले गर्दा लगभग १० लाख कम्बोडियाली युद्धका अवशेषबाट प्रभावित छन्।

कम्बोडियाले सन् २०२५ सम्ममा खानीमुक्त बनाउने लक्ष्य राखेको थियो तर सरकारले आर्थिक चुनौती र थाइ सीमामा भेटिएका नयाँ गोलाबारुदका कारण उक्त समयसीमा ५ वर्ष पछाडि सारेको छ।