भारतमा थप दुई लाख ७१ हजारभन्दा बढी काेभिड संक्रमित

काठमाडाैँ – भारतमा गत २४ घण्टामा काेभिड भाइरसबाट थप दुई लाख ७१ हजार २०२ जना सङ्क्रमित भएका केन्द्रीय स्वास्थ्य र परिवार कल्याण मन्त्रालयले आइतबार जानकारी दिएको छ । शनिबार परिक्षण गरिएका १६.२८ प्रतिशतलाई काेभिड पोजेटिभ देखिएको समाचारमा जनाइएको छ । यसैसँगै भारतमा कूल सङ्क्रमितको संख्या तीन करोड ७१ लाख २२ हजार १६४ पुगेको छ । 

सोही अवधिमा थप ३१४ जनाको काेभिड सङ्क्रमणका कारण मृत्यु भएको छ । यसैसँगै भारतमा काेभिडका कारण ज्यान गुमाउने व्यक्तिको सङ्ख्या चार लाख ८६ हजार ६६ पुगेको मन्त्रालयले थप जानकारी दिएको छ । 

---

हाल यहाँ सात हजार ७४३ ओमिक्रोनका सङ्क्रमित रहेका पनि सो मन्न्त्रालयले शुक्रबार जानकारी दिएको छ । भारतमा अहिले सङ्क्रमित अवस्थामै रहेकाको सङ्ख्या १५ लाख ५० हजार ३७७ रहेका छन् । सक्रिय सङ्क्रमितको यो  संख्या कूल सङ्क्रमितको ४.१८ प्रतिशत भएको समाचारमा जनाइएको छ । 

भारतमा एक लाख ३८ हजार ३३१ काेभिडबाट मुक्त भएका छन् । यसैसँगै काेभिड सुरु भएयता हालसम्म तीन करोड ५० लाख ८५ हजार ७२१ जनालाई काेभिड सङ्क्रमण निको भएको छ । यहाँ काेभिड भाइरस निको हुने दर ९५.५१ प्रतिशत रहेको जनाइएको छ । 

काेभिड सुरु भएदेखि हालसम्म भारतमा ७० करोड २४ लाख ४८ हजार ८३८ भन्दा बढी व्यक्तिको काेभिड परीक्षण भएको छ । यहाँ सन् २०२१ को जनवरी १६ बाट काेभिड भाइरसविरुद्ध खोप अभियान सुरु भएको थियो । सो समयदेखि हालसम्म एक अर्ब ५६ करोड ७६ लाखभन्दा बढी  काेभिडविरुद्ध खोपको डोज लगाइएको छ।