ट्रम्पका दर्जन बढी निर्णय बाइडनले पहिलो दिनमै उल्ट्याए

काठमाडौं : ह्वाइट हाउस प्रवेश गरेको पहिलो दिनमै अमेरिकी राष्ट्रपति जो बाइडनले निवर्तमान राष्ट्रपति डोनाल्ड ट्रम्पका दर्जन बढी निर्णय उल्ट्याएका छन् । बाइडनले सबैभन्दा पहिले कोभिड-१९ महामारीबारेबारेमा ट्रम्पले गरेका निर्णयहरु उल्ट्याएका हुन् ।

ट्रम्पले महामारीलाई सामान्य सम्झेर लापरबाही गर्दा चार लाख बढी अमेरिकी नागरिकले ज्यान गुमाउनु परेको आरोप बाइडनले लगाउँदै आएका थिए । अमेरिकी राष्ट्रपतिको शपथ खाएकै दिन बाइडनले कोभिडसँगै जलवायु परिवर्तन, आप्रवासी तथा जातीय विभेदसम्बन्धिका दर्जन बढी निर्णय उल्ट्याएका हुन् ।  

---

बाइडनले कोडिभविरुद्धको खोप र रोकथामको प्रयासका लागि गएको महिना नै वैज्ञानिकहरुको विशेष टिम बनाएर परिचालन गरेका थिए । राष्ट्रपतिको कार्यभार सम्हालेको पहिलो दिनमै उनले त्यसलाई थप व्यवस्थित र प्रभावकारी बनाउने आदेशहरुमा हस्ताक्षर गरेका छन् ।

ह्वाइट हाउस प्रवेश गरेपछि ट्रम्पका निर्णय उल्ट्याएको जानकारी ह्वाइट हाउसले विज्ञप्ति निकालेर दिएको छ । ट्रम्प प्रशासनले गरेका निर्णय उल्ट्याउनु देशका लागि थप अगाडी बढ्नु र अमेरिकी नागरिकका लागि राहतको विषय भएको बाइडनको भनाई छ ।

यस्तै बाइडनले विश्व स्वास्थ्य संगठन डब्लुएचओमा फेरि सहभागिता जनाउने निर्णय गरेका छन् । अमेरिकाका तर्फबाट डा. एन्थोनी फाउचीलाई यसै हप्ता हुने डब्लुएचओको अन्तर्राष्ट्रिय कार्यकारी समितिको बैठकमा पठाउने निर्णय बाइडनले गरेका छन् । यसअघि ट्रम्पले डब्लुएचओबाट बाहिरिने निर्णय गरेका थिए । जसको चौतर्फी आलोचना भएको थियो । 

यस्तै कोभिडका लागि सुरक्षा सामग्री, परीक्षणको दायरा बढाउने, मास्क लगाउन प्रेरित गर्ने र सामाजिक दुरी कायम गरेर कोभिडबाट जोगिने उपाय लगाइने लगायतका आदेशमा बाइडनले हस्ताक्षर गरेका छन् । 

यस्तै बाइडनले आगामी १०० दिनसम्म मास्क लगाइराख्‍ने अभियान नै सञ्चालन गर्ने पनि घोषणा गरेका छन् । यस्तै सन् २०१५ मा हस्ताक्षर गरिएको पेरिस जलवायु सम्झौतामा फेरि सामेल हुने निर्णय बाइडनले गरेका छन् । यसअघि ट्रम्पले सो सम्झौताबाट बाहिरिने निर्णय गरेका थिए । यसले ट्रम्पलाई जलवायु परिवर्तनविरुद्धको नेताका रुपमा परिचित गराएको थियो भने यस प्रकारको निर्णयले अमेरिकालाई थप आलोचित बनाएको थियो ।

यस्तै पछिल्लो समय तिब्र रुपमा बढिरहेको जातीय विभेदका घटनालाई रोक्न बाइडनले निर्णायक कदम चाल्ने तयारी गरेका छन् । यसको शुरुवातमा उनले मुस्लिममाथिको प्रतिबन्ध फुकुवा गरेका छन् । सबैभन्दा धेरै आप्रवासी छिर्ने मेक्सिकोसँगको सीमामा पर्खाल लगाउने निर्णय पनि बाइडनले उल्ट्याएका छन् ।

यसअघि ट्रम्पले मुस्लिम बाहुल्य रहेका देशका नागरिकलाई अमेरिका छिर्न प्रतिबन्ध लगाएका थिए । ट्रम्पका धेरै निर्णय उल्ट्याएका बाइडनले अमेरिकालाई फेरि विकासकै गतिमा अगाडी बढाउने प्रतिबद्धता व्यक्त गरेका छन् । (अन्तराष्ट्रिय सञ्चारमाध्यमको सहयोगमा)