जापानमा हिमपातका कारण मृत्य हुनेको संख्या ७० पुग्यो

काठमाडौँ : जापानमा हिमपातका कारण मृत्यु हुनेको संख्या ७० पुगेको छ । जापानी अखबार दि जापान टाइम्सका अनुसार जापानका १० क्षेत्रमा गरी ७० जनाको मृत्यु भएको हो । उल्लेखित मृतक संख्या डिसेम्बर १४ बाट गत बुधबार सम्मको हो ।  

जापानको होक्काइडो, अमोरी, इवाते, मियागी, अकिता, यामागाता, निगाता, तोयामा, इसिकावा र फुकुईमा जस्ता क्षेत्रहरूमा भिषण हिमपात हुँदा ती जापानीको मृत्यु भएको जनाइएको छ । मृत्यृ भएका जापानीमध्ये ४८ जनाको उमेर ७० वर्ष भन्दा माथि रहेको बताइएको छ । हिपातका कारण घरको छतमा जम्मा भएको हिउँ हटाउन खोज्दा अधिकांश वद्ध–वद्धाहरूको खसेर मृत्यृ भएको जापानी सञ्चार माध्यममा प्रकाशित खबरमा उल्लेख गरिएको छ ।

---

 ‘घरको छतमा रहेको हिउँ हटाउने सेवा प्रदान गर्ने कम्पनीहरू एक महिनापछि मात्रै आइपुग्ने हुँदा वृद्धा–वृद्धा आफै त्यसमा नलागि धर छैन । जसले गर्दा उनीहरू दुर्घटनामा पर्ने क्रम रोकिएको छैन’ एक जापानी सरकारी अधिकारीले दि जापान टाइम्ससँग भनेका छन् । 

उता अकितामा रहेर प्रकोप ब्यवस्थापन केन्द्रका लागि काम गरिरहेका अर्का जापानी अधिकारीले कोभिड–१९ का कारण धेरै युवा जापानी घर फर्कन नपाएकाले पनि यस किसिमको दुर्घटना बढेको बताएका छन् । ‘धेरै जसो घरमा अहिले वृद्ध–वृद्धा मात्रै छन् । ती घरहरुका अन्य सदस्यहरू लकडाउनका कारण घर फर्कन पाएका छन् । जसले वृद्ध–वृद्धा आफै हिउँ पन्छाउने काममा भिड्नु परेको छ’ ती अधिकारीले दि जापान टाइम्ससँग भनेका छन् । 

जापानमा युवा जनसंख्या घटिरहेकाले हिउँ पन्छाउने काम गर्ने कम्पनीहरुमा कामदारको अभाव छ । जसले गर्दा जापानी घरहरूमा वृद्ध–वृद्धा नै यस किसिमको काममा सहभागी हुने गरेका छन् ।