भारत र चीनका सैन्य दस्ताबीच सीमामा फेरि झडप

काठमाडौँ : उत्तर भारतीय राज्यको सिक्किमको नाकु लामा भारत र चीनका सीमा सुरक्षा दस्ताबीच झडप भएको छ । भारतीय सञ्चार माध्यम इन्डियन टुडेका अनुसार सिक्किमको तिब्बतसँग जोडिएको नाकु लामा चिनियाँ सुरक्षा दस्ताले घुसपैठ गर्न खोजेपछि झडप भएको हो ।

गत साता चिनियाँ सुरक्षा दस्ता भारतीय भूमितर्फ छिर्न खोजेको र त्यहाँ रहेका भारतीय सुरक्षा दस्ताले रोक्दा झडप भएको इन्डिया टुडेको दाबी छ । झडपमा दुबै तर्फका सैन्य जवान घाइते भएको इन्डिया टुडेले सोमबार प्रकाशित गरेको रिपोर्टमा उल्लेख गरिएको छ । भारत तर्फ चार र चीन तर्फ २० जना घाइते भएको इन्डिया टुडेले स्रोतको हवाला दिँदै जनाएको छ ।

---

झडप चिनियाँहरु पछि हटेको र अहिले त्यहाँको अवस्था स्थिर रहेको पनि बताइएको छ । भारत र चीनका अधिकारीहरुबीच सिमामा जारी तनाब मत्थर बनाउन बसेको ९ औं चरणको बैठक लगत्तै झडप भएको हो । पूर्वी लद्दाखमा आइतबार बसेको बठैक सकिदैँ अर्को झडप भएपछि दुई एसियाली शक्तिबीच तनाब फेरि बढ्ने विश्लेषण गरिएको छ ।

गत जुनमा दुई मुलुकका सीमा सुरक्षा दस्ता पूर्वी लद्दाखको गलवान उपत्यकामा भिडेका थिए । त्यसयता, सो क्षेत्रमा दुवै मुलुकबाट करिब एक लाख सैन्य दस्ता खटाइएको छ । सन् २०१७ मा भारत र चीन सीममा आमनेसामने हुँदा नाकु लामा समेत झडप भएको थियो ।