थाल ठटाएर सैनिक ‘कू’ को विरोध गरेपछि म्यानमारमा फेसबुक बन्द !

काठमाडौँ : सेनाले सत्ता हातमा लिएको म्यानमारमा फेसबुक बन्द भएको छ । बुधबार बेलूकी थाल ठटाएर म्यानमारका नागरिकले सैनिक ‘कू’को विरोध गरेका थिए । थाल ठटाउँदै गरेको फोटो तथा भिडियो सामाजिक सञ्जालमा पोष्ट गरेपछि सेनाले फेसबुक बन्द गराएको हो ।

फेसबुकमार्फत सैनिक कू को विरोध बढेपछि त्यसलाई रोक्न फेसबुक बन्द गराइएको म्यानमारबाट नेपाली पत्रकार दीपक भट्टराईले जानकारी दिएका छन् । फेसबुक बन्द भएको जानकारी गराउँदै उनले ट्वीटरमा लेखेका छन्, ‘मेरो फेसबुक बन्द भयो। ट्विटर कहिलेसम्म चल्छ थाहा छैन।’

---

फेसबुकमार्फत कू को विरोध गर्न थालेपछि त्यहाँको सैनिक सरकारले इन्टरनेट प्रदायक कम्पनीलाई फेसबुक बन्द गर्न निर्देशन दिएको थियो । गएको सोमबार म्यानमार सेनाले राष्ट्रपति, प्रधानमन्त्रीदेखि नेता कार्यकर्तालाई पक्राउ गरेर एक वर्षे संकटकाल घोषणा गरेको छ ।