कोभिड-१९ विरूद्ध खोप लगाउन अमेरिकाले सेना परिचालन गर्ने

काठमाडौँ : अमेरिकाले कोभिड-१९ विरुद्धको खोप दिने प्रयोजनका लागि सेना परिचालन गर्ने भएको छ । पछिल्लो समयमा अमेरिकामा कोभिड-१९ का कारण ज्यान जाने नागरिकको संख्या दिन प्रतिदिन बढ्दै गएकोले यसको सङ्क्रमणलाई कम गर्न र यसका विरुद्धको खोप लगाउने कार्यलाई गति दिन सेना परिचालन गर्ने भएको हो ।

अमेरिकाको फेडरल इमर्जेन्सी म्यानेजमेन्ट एजेन्सीले गरेको अनुरोधलाई रक्षा मन्त्रालयले स्वीकार गरेको अन्ताराष्ट्रिय सञ्‍चार माध्यमहरूले जनाएको छ । अमेरिकी रक्षामन्त्री लियोद अस्टिनसँग उक्त फेडरल ब्युरोले सेनाको सहयोगका लागि अनुरोध गरेको र उनले यसलाई स्वीकार गरेको समाचारमा जनाइएको छ ।

---

सो सहयोग अन्तर्गत अमेरिकी रक्षा मन्त्रालयले सो इमर्जेन्सी विभागका लागि एक हजार एक सय दश सैनिक खटाउने उल्लेख छ । अमेरिकी राष्ट्रपति जो बाइडनले यही फेब्रुअरी १५ सम्ममा देशभर सबै नागरिकलाई आम रुपमा यो खोप दिने बताए अनुरुप नै खोप केन्द्रहरु सार्वजनिक स्थलहरूमा राखिने छ ।

यस प्रयोजनका लागि यहाँको सेनाले सैनिक चिकित्सकहरु र स्वास्थ्यकर्मीहरु लाई खटाउने छन् । ती अधिकारीहरूका अनुसार अमेरिकामा पछिल्लो समयमा कोभिड-१९ का संक्रमितहरूको संख्या बढ्दै गएको र मृत्यु हुनेको संख्या पहिलेका तुलनामा झनै बढ्न थालेकाले यसविरुद्धको खोप लगाउने प्रक्रियालाई थप गति दिनुपर्नेमा जोड दिइएको बताइएको छ । (रासस)