अमेरिकाले इरानमाथिको नाकाबन्दी नहटाउने

वासिङ्टन : अमेरिकी राष्ट्रपति जो बाइडेनले इरानमाथि लगाइएको नाकाबन्दी नहटाउने जानकारी दिएका छन् । एक अमेरिकी सञ्‍चारमाध्यमलाई दिएको अन्तरवार्ताका क्रममा राष्ट्रपति बाइडेनले नाकाबन्‍दी नहटाउने जानकारी दिएका हुन् । 

इरानले युरेनियमको प्रयोगसम्बन्धी कार्य बन्द नगर्दासम्म अमेरिकाले इरानमाथि लगाएको प्रतिबन्ध नहटाउने उनले बताएका हुन् । यदि इरानमाथिको प्रतिबन्ध हटाउने हो भने यसभन्दा अगाडि नै इरान वार्ताको टेबलमा आउने र आणविक सम्बन्धी सम्झौतामा हस्ताक्षर गर्ने गर्नुपर्छ, राष्ट्रपति बाइडेनले भनेका छन् । 

---

अमेरिकाको सिबीएस न्युजलाई शुक्रबार दिएको अन्तरवार्तामा उनले सो कुरामा जोड दिएको समाचारमा जनाइएको छ । इरानका विदेशमन्त्री मोहमद जभाद जारिफले गत शनिबार एक अन्तरवार्ताका क्रममा अमेरिकाले आफूहरूमाथि अवैधानिक रुपमा नाकाबन्दी लगाएको आरोप लगाएका थिए । 

लगत्तै अमेरिकी राष्ट्रपति बाइडेनको यो प्रतिक्रिया आएको हो । विदेशमन्त्री जारिफले अमेरिकाले आफूहरूमाथि लगाएको प्रतिबन्दका कारण धैर्यता टुटिसकेको बताएका थिए । रासस