पूर्वराष्ट्रपति ट्रम्पविरुद्धको महाभियोगको सुनुवाइ सुरु

वासिङ्टन : अमेरिकी पूर्वराष्ट्रपति डोनाल्ड ट्रम्पविरुद्धको महाभियोग प्रस्तावमाथि अमेरिकी संसद्को माथिल्लो सदन सिनेटमा मंगलबारदेखि सुनुवाई सुरु हुँदैछ । अमेरिकाका राष्ट्रपतिमाथि एकै कार्यकालमा दुई पटक महाभियोग दर्ता भएको यो पहिलो घटना हो । पूर्वराष्ट्रपति ट्रम्पका तर्फबाट सिनेटमा जवाफ दिन नियुक्त वकीलहरूले सिनेटमा विचाराधीन महाभियोग प्रस्ताव राजनीतिक पूर्वाग्रहबाट प्रेरित रहेको आरोप लगाएका छन् ।

तर महाभियोग दर्ता गरेको डेमोक्रेटिक पार्टीले भने अमेरिकी संसद् भवनमा गत जनवरी ६ का दिन आक्रमण गर्न आफ्ना समर्थकलाई उक्साएर सत्ताविद्रोह गर्न खोजेको बताएका छन् । घटनामा एक प्रहरी अधिकृतसहित पाँच जनाको मृत्यु भएको थियो भने संसद् भवनभित्र व्यापक तोडफोड र क्षति पुगेको थियो ।

---

ट्रम्प समर्थकको आक्रमणपछि अमेरिकी तल्लो सदनले तत्कालीन राष्ट्रपति ट्रम्पविरुद्ध महाभियोगको प्रस्ताव पारित गरी सिनेटमा अनुमोदनका लागि पठाएको थियो । यद्यपी राष्ट्रपति ट्रम्पको कार्यकाल गत जनवरी २० मै समाप्त भई नयाँ राष्ट्रपति जो वाइडनले पदभार ग्रहण गरिसकेका छन् । 

तर अमेरिकी संविधानबमोजिम पहिल्यै सिनेटमा दर्ता भइसकेको महाभियोगको प्रस्तावमाथि मंगलबारदेखि सुनुवाई सुरु हुन लागेको हो । सिनेटमा रिपब्लीकन पार्टीका केही सदस्यले ट्रम्पको कार्यकाल समाप्त भइसकेको अवस्थामा महाभियोग प्रस्तावलाई अगाडि बढाउन उचित नहुने तर्क गरिरहेका छन् । 

सिनेटका केही रिपब्लीकन सदस्यले भने महाभियोग सही र उपयुक्त रहेको बताए पनि अन्तिम मतदानमा सहभागी हुने वा नहुने स्पष्ट भइसकेको छैन । अमेरिकी राष्ट्रपतिमाथिको महाभियोग प्रस्ताव पारित हुन सिनेटको दुई तिहाई मत आवश्यक पर्दछ । 

एक सय सदस्य रहने अमेरिकी सिनेटमा हाल डेमोक्रेट र रिपब्लीकन पार्टीको बराबर अर्थात् ५०/५० स्थान रहेको छ ।  राष्ट्रपति जो वाइडनले ट्रम्पमाथिको महाभियोगबारे आफूले कुनै पक्ष नलिने बरु सिनेटले नै यसबारेमा निर्णय गर्ने विचार व्यक्त गरेका छन् । 

ह्वाइट हाउसकी प्रवक्ता जेन साकीले राष्ट्रपति वाइडनले यसअघि चुनावकै दिनहरुमा राष्ट्रपतिका रूपमा ट्रम्प उपयुक्त व्यक्ति नभएको भनाइ सार्वजनिक गरिसकेका उल्लेख गरेकी छन् । सिनेटमा महाभियोग पारित भए सिनेटको सामान्य बहुमतले भावी दिनमा ट्रम्पले राष्ट्रपतिका रूपमा उम्मेदवार हुनबाट रोक्नेछ । (रासस)