भारतमा कोभिड-१९ संक्रमित र मृतकको संख्या बढ्दै, २४ घण्‍टामा ४७ हजार नयाँ संक्रमित थपिए

नयाँदिल्ली : भारतमा कोभिड-१९ बाट संक्रमित हुनेको सङ्ख्यामा फेरि वृद्धि हुन थालेको छ । केन्द्रीय स्वास्थ्य तथा परिवार कल्याण मन्त्रालयले सोमबार दिएको जानकारीअनुसार पछिल्लो २४ घण्टामा भारतमा करीब ४७ हजार जना संक्रमित भएका छन् ।

 गत २४ घण्टामा कोभिड-१९ संक्रमितको यो सङ्ख्या यसवर्ष सुरु भएयताको नै सवैभन्दा बढी हो । यस अवधीमा संक्रमणबाट २१२ जनाको मृत्यु भएपछि यहाँ कूल मृतकको सङ्ख्या एक लाख ५९ हजार ९६७ पुगेको सोमबार सो मन्त्रालयले जनाएको छ  । 

---

भारतमा अहिलेसम्म कूल संक्रमितको सङ्ख्या एक करोड १६ लाख ४६ हजार ८१ पुगेको मन्त्रालयले जानकारी दिएको  छ । कूल संक्रमितमध्ये तीन लाख ३४ हजार ६४६ जना अहिले पनि संक्रमित अवस्थामै रहेका छन् भने कूल एक करोड ११ लाख ५१ हजार ४६८ जना संक्रमणमुक्त भएका छन् । 

भारतमा जनवरीबाट कोभिड-१९ विरुद्धको खोप अभियान सुरु भएको थियो । सो समयदेखि हालसम्म चार करोड ५० लाख भन्दा बढीले खोप लगाइसकेका छन् ।

भारतको राष्ट्रिय राजधानी दिल्लीमा गत २४ घण्टामा ८२३ जनामा कोभिड-१९ संक्रमण देखिएको र एक जनाको मृत्यु भएको हो । नयाँ दिल्लीमा कोभिड-१९ सुरु भएदेखि यता हालसम्म १० हजार ९५६ जनाको मृत्यु भइसकेको छ । 

त्यसैगरी कोभिड-१९ परीक्षण गर्ने क्रम पनि चलिरहेको भारतीय चिकित्सा अनुसन्धान परिषदले जनाएको छ । परिषद्का अनुसार आइतबारसम्म भारतमा २३ करोड ४० लाख भन्दा बढी व्यक्तिको कोभिड-१९ परीक्षण गरिएको छ । आइतबार एकै दिनमा १० लाख ६३ हजार भन्दा जनाको कोभिड-१९ परीक्षण गरिएको छ । रासस