बर्मामा सयौँ आन्दोलनकारीको रिहाइ

काठमाडौँ: बर्माको सैन्य सरकाले सयौँ आन्दोलनकारीलाई रिहा गरेको छ । अन्तराष्ट्रिय समाचार एजेन्सी रोयटर्सले यागुंन सहरको इनसेइन जेलबाट बुधबार आन्दोलकारीलाई छाडिएको बताएको छ । रिहा गरिएकामा वकिलहरू पनि रहेको रोयटर्सको रिपोर्टमा उल्लेख गरिएको छ । कती संख्यामा आन्दोलकारीलाई छाडिएको हो भन्ने पुष्टी हुन सकेको छैन ।  

सैन्य सरकारले आन्दोलकारी रिहा गरेकै दिन यागुंन सहर भने बन्द रहेको छ । आन्दोलनकारीले बन्दको आवहन गरेपछि पुरै सहर सुनसान बनेको रोयटर्सको रिपोर्टमा उल्लेख गरिएको छ ।  फ्रेबुअरी १ मा कू गरिएपछि बर्मेली नागरिक सडक संघर्षमा छन् । आन्दोलनलाई दबाउन सैन्य सरकारले ब्यापक बल प्रयोग गरेको अन्तर्राष्ट्रिय सञ्चार माध्यम तथा मानव अधिकारवादी संगठनले बताएका छन् । आन्दोलन दबाउने नाममा बर्मेली सेनाले करिब दुई हजार प्रदर्शनकारीलाई गिरफ्तार गरेको रोयटर्सले लेखेको छ । 

---

बर्माको ठूलो सहरमध्येको एक मन्डलेमा सोमबार स्थानिय सात वर्षिय बालिकालाई सेनाको गोली लागेपछि विरोधस्वरुप यागुंन बन्द गराइएको हो । सेनाको गोली लागि यसअघि नै मन्डलेमा दुई सय ७५ को मृत्य भइसकेको छ । 

यसैबीच सेनाका प्रवक्ता ज मिन तुनले एक सय ६४ आन्दोलकारीको मृत्य भएको बताएको छन् । अमेरिका र युरोपियन युनियन (ईयू) ले थप प्रतिबन्धको घोषणा गरेको एक दिनपछि सेनाका प्रवक्ताले मृत्य हुनेप्रति आफ्नो समवेदना रहे पनि जिम्मवेरी आन्दोलनकारीले नै लिनुपर्ने बताए । उनले आन्दोलनकारीको आक्रमणमा परेर अहिलेसम्म नौ सुरक्षाकर्मीले पनि ज्यान गुमाएको दाबी गरे । 

अस्पताल पूर्णरुपमा सञ्चालन नहुनु र आन्दोलनलनकारी आफैँले सहर बन्द गराउँदा मृतकको संख्या बढेको पनि सेना प्रवक्ताको दाबी थियो । सैन्य सरकारको विपक्षमा रहेकाहरूले बर्मामा निरन्तर बन्दको आह्वान गर्दै आएका छन् । सरकारी कर्मचारीसमेतको संलग्नतामा भइरहेको आन्दोलनले बर्मालाई अस्तव्यस्त बनाएको छ । यसैबीच बर्मेली सेनाले विपक्षीहरूले गठन गरेको पिडाङसु लुट्व (सीआरपीएच) लाई अवैध घोषणा गर्दै त्यसको सदस्यता लिने बर्मेलीलाई कारबाही गर्ने बताएको छ । 
उता बन्दी बनाइएकी आङ साङ सूकीबारेमा बुधबार बर्मेली अदालतमा सुनुवाइ हुँदैछ । सूकी अदालत नजाने भए पनि भिडियो कन्फ्रेन्सका माध्यमबाट उनलाई प्रस्तुत गरिनेछ ।