आज सर्वाेच्चको 'फुल कोर्ट', १४ न्यायाधीशले बहिष्कार गर्ने

काठमाडौं -  प्रधानन्यायाधीश चोलेन्द्रशम्शेर जबराले आज (सोमबार) सर्वोच्च अदालतको पूर्ण बैठक (फुलकोर्ट) बोलाएका छन् । आइतबार नेपाल बारका पदाधिकारीसँग भएको छलफलपछि प्रधानन्यायाधीश आज फुलकोर्ट बोलाउन तयार भएका हुन् ।

प्रधानन्यायाधीशले मिडियामा आएका विभिन्न शंका, उपशंका, चर्चा परिचर्चा, टिप्पणी सबै विषयमा आफ्नो गम्भीर ध्यानाकर्षण भएको र यो विषय फुलकोर्टमा राख्ने जानकारी गराएको बारका महासचिव लीलामणि पौडेलले जानकारी दिए ।

---

जबराले नेपाल बार एशोसिएसनका पदाधिकारीसँगको सहमतिमा फुलकोर्ट बोलाएपनि असन्तुष्ट १४ न्यायाधीश अनुपस्थित हुने भएका छन् । कार्यपालिकामा भाग खोज्ने प्रधानन्यायाधीशको शैलीप्रति असन्तुष्टि जनाउँदै सर्वोच्च अदालतका १४ जना न्यायाधीशले पूर्ण बैठकमा नजाने निर्णय गरेका थिए । मन्त्रिपरिषद्‍मा भागवण्डा लिएको, पेसी प्रणाली परिवर्तन अस्वीकार गरेको आरोप जबरामाथि छ।